(សៀមរាប)៖ ដោយអនុវត្តតាមអនុសាសន៍ណែនាំដ៏ខ្ពង់ខ្ពស់របស់នាយឧត្តមសេនីយ៍ ស ថេត អគ្គស្នងការនគរបាលជាតិ លោកឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប នៅថ្ងៃទី១០ ខែវិច្ឆិកា ឆ្នាំ២០២៦នេះ បានអញ្ជើញជាអធិបតីក្នុងកិច្ចប្រជុំដកពិសោធន៍លើការងារគ្រប់គ្រងសន្តិសុខឯកជន រវាងស្នងការដ្ឋាននគរបាលខេត្តសៀមរាប ជាមួយភ្នាក់ងារផ្តល់សេវាសន្តិសុខឯកជន និងសហគ្រាស គ្រឹះស្ថានដែលប្រើប្រាស់ភ្នាក់ងារ សន្តិសុខផ្ទាល់ខ្លួន។

ក្នុងឱកាសនោះ លោកឧត្តមសេនីយ៍ទោ ហួត សុធី បានលើកឡើងថា សេវាសន្តិសុខឯកជន និងសហគ្រាស គ្រឹះស្ថាន បានសហការល្អជាមួយកម្លាំងនគរបាល ក្នុងការចូលរួមអនុវត្តការងារគ្រប់គ្រងសន្តិសុខ និងបំពេញភារកិច្ចតាមតួនាទីរៀងៗខ្លួន។ ការចូលរួមរបស់វិស័យសន្តិសុខឯកជន គឺជាផ្នែកមួយដែលមិនអាចខ្វះបានក្នុងការជួយសម្រួលដល់ការងាររក្សាសន្តិសុខ សុវត្ថិភាព និងសណ្តាប់ធ្នាប់សាធារណៈ ព្រមទាំងរួមចំណែកបង្ការ ទប់ស្កាត់បទល្មើស និងហានិភ័យផ្សេងៗនៅតាមគោលដៅដែលខ្លួនទទួលខុសត្រូវ។

លោកឧត្តមសេនីយ៍ទោ បានស្នើដល់សហគ្រាស គ្រឹះស្ថានទាំងអស់ បន្តពង្រឹងកិច្ចសហការជាមួយសមត្ថកិច្ចនគរបាលឱ្យកាន់តែជិតស្និទ្ធ និងមានប្រសិទ្ធភាព ក្នុងការចូលរួមរក្សាសន្តិសុខ សុវត្ថិភាពតាមទីតាំង និងក្នុងឱកាសរៀបចំព្រឹត្តិការណ៍ធំៗ រួមមាន៖ ពិធីបុណ្យជាតិ អន្តរជាតិ និងកម្មវិធីសាធារណៈនានា ជាពិសេសការចូលរួមការពារថ្នាក់ដឹកនាំ ភ្ញៀវជាតិ និងអន្តរជាតិ ព្រមទាំងប្រជាពលរដ្ឋដែលចូលរួមក្នុងព្រឹត្តិការណ៍ទាំងនោះ។

លោកស្នងការនគរបាលខេត្ត បញ្ជាក់ថា ការសហការនេះត្រូវផ្អែកលើការទំនាក់ទំនង ការផ្លាស់ប្តូរព័ត៌មាន និងការរាយការណ៍ជូនសមត្ថកិច្ចបានទាន់ពេលវេលា ដើម្បីរួមគ្នាបង្ការ ទប់ស្កាត់ និងដោះស្រាយរាល់បញ្ហាដែលអាចប៉ះពាល់ដល់សន្តិសុខ សុវត្ថិភាព និងសណ្តាប់ធ្នាប់សាធារណៈ។

លោកឧត្តមសេនីយ៍ទោ ក៏បានដាក់ចេញនូវទិសដៅណែនាំសំខាន់ៗ ដើម្បីដោះស្រាយបញ្ហាប្រឈម និងពង្រឹងប្រសិទ្ធភាពការងារគ្រប់គ្រងសន្តិសុខឯកជន ដោយតម្រូវឱ្យការិយាល័យជំនាញរៀបចំបែងចែកក្រុមការងារឱ្យបានច្បាស់លាស់ ដើម្បីចុះល្បាត ត្រួតពិនិត្យ និងអន្តរាគមន៍តាមគោលដៅជាប្រចាំ ព្រមទាំងជំរុញឱ្យក្រុមហ៊ុនផ្តល់សេវាសន្តិសុខឯកជនទាំង ៤៦ក្រុមហ៊ុន និងសហគ្រាស គ្រឹះស្ថានទាំង ៤៥ ដែលប្រើប្រាស់ភ្នាក់ងារសន្តិសុខផ្ទាល់ខ្លួន រាយការណ៍អំពីស្ថានភាពសន្តិសុខតាមគោលដៅឱ្យបានទៀងទាត់ និងសិក្សាលទ្ធភាពបើកសាខានៅខេត្តសៀមរាប ចំពោះក្រុមហ៊ុនដែលមិនទាន់មានទីតាំងក្នុងខេត្ត។

ក្នុងនោះដែរ ក៏ត្រូវផ្តល់បញ្ជីឈ្មោះភ្នាក់ងារសន្តិសុខ និងឯកសារគតិយុត្តពាក់ព័ន្ធជូនការិយាល័យជំនាញ ដើម្បីងាយស្រួលក្នុងការគ្រប់គ្រង និងកំណត់អត្តសញ្ញាណ ព្រមទាំងបង្កើនការបណ្តុះបណ្តាល និងបំពាក់បំប៉នសមត្ថភាព ស្មារតី និងវិជ្ជាជីវៈដល់ភ្នាក់ងារ ដោយជំរុញឱ្យចូលរួមវគ្គបណ្តុះបណ្តាលដែលរៀបចំដោយស្ថាប័នជំនាញ ជាពិសេសភ្នាក់ងារដែលមិនធ្លាប់បានចូលរួម។

ជាមួយនេះដែរ លោកឧត្តមសេនីយ៍ទោ ហួត សុធី បញ្ជាក់ទន្ទឹមនឹងនេះ ត្រូវអនុវត្តតាមអនុក្រឹត្យពាក់ព័ន្ធ សហការរាយការណ៍ និងចូលរួមបង្ការ ទប់ស្កាត់អំពើឆបោកតាមប្រព័ន្ធអនឡាញ (Online Scam) មិនត្រូវរក្សាទុក អត្តសញ្ញាណប័ណ្ណ ឬឯកសារច្បាប់ដើមរបស់ភ្នាក់ងារឡើយ ត្រូវពិនិត្យលក្ខខណ្ឌអាយុឱ្យស្របតាមច្បាប់ស្តីពីការងារ និងត្រូវប្រើប្រាស់ឯកសណ្ឋានឱ្យបានត្រឹមត្រូវ ដោយមិនត្រូវប្រើឯកសណ្ឋាន ដែលមានលក្ខណៈស្រដៀងនឹងឯកសណ្ឋានមន្ត្រីសាធារណៈ ឬកងកម្លាំងប្រដាប់អាវុធគ្រប់ប្រភេទឡើយ៕