(បាត់ដំបង)៖ អនុវត្តតាមអនុសាសន៍ដ៏ខ្ពង់ខ្ពស់របស់លោក សុខ លូ អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជា ខេត្តបាត់ដំបង នៅថ្ងៃទី១០-១១ ខែវិច្ឆិកា ឆ្នាំ២០២៦ នេះ សាខាកាកបាទក្រហមកម្ពុជា ខេត្តបាត់ដំបង បានរៀបចំវគ្គបណ្ដុះបណ្ដាលវិជ្ជាសង្គ្រោះបឋម ជូនដល់មន្ត្រី និងបុគ្គលិកនៃព្រះវិហារសេចក្ដីមេត្តាករុណានៃព្រះគ្រីស្ទ ខេត្តបាត់ដំបង។

វគ្គបណ្តុះបណ្តាលនេះមានសិក្ខាកាមចូលរួមសរុបចំនួន ៣៤នាក់ ក្នុងនោះមានស្រី ១៨នាក់ ដោយលោក កុសុម សុភីនារ៉ា នាយកសាខាកាកបាទក្រហមកម្ពុជា ខេត្តបាត់ដំបង បានចាត់មន្ត្រីទទួលបន្ទុកការងារវិជ្ជាសង្គ្រោះបឋមនៃសាខា ដើម្បីបើកវគ្គបណ្ដុះបណ្ដាលដ៏មានសារៈសំខាន់នេះ។ គោលបំណងសំខាន់នៃវគ្គបណ្ដុះបណ្ដាលមូលដ្ឋានវិជ្ជាសង្គ្រោះបឋមនេះ គឺដើម្បីសម្រេចបាននូវយុទ្ធសាស្ត្រឆ្នាំ២០២១-២០៣០ របស់កាកបាទក្រហមកម្ពុជា ក្នុងការឈានឆ្ពោះទៅរកគ្រួសារមួយមានអ្នកយល់ដឹងអំពីវិជ្ជាសង្គ្រោះបឋមម្នាក់ ដែលជាចំណេះដឹងដ៏មានប្រយោជន៍អាចជួយសង្គ្រោះអាយុជីវិតបានទាន់ពេលវេលា នៅពេលមានគ្រោះថ្នាក់ជាយថាហេតុ។

មានមតិសំណេះសំណាលបើកវគ្គបណ្តុះបណ្តាល មន្រ្តីសាខា បាននាំមកនូវប្រសាសន៍ផ្ដាំផ្ញើសាកសួរសុខទុក្ខដល់សិក្ខាកាមក្នុងវគ្គពីសំណាក់ លោក សុខ លូ ប្រធានគណៈកម្មាធិការសាខា និងសូមឱ្យសិក្ខាកាមយកចិត្តទុកដាក់រាល់ការធ្វើបទបង្ហាញនីមួយៗ ដែលគ្រូឧន្ទេស បានបង្ហាត់បង្ហាញ ក៍ដូចជាចែករំលែកចំណេះដឹង បទពិសោធន៍ និងការអនុវត្តការងារជាក់ស្តែង។


ក្នុងវគ្គបណ្ដុះបណ្ដាលនេះ សិក្ខាកាមទាំងអស់បានសិក្សាយ៉ាងយកចិត្តទុកដាក់ទាំងផ្នែកទ្រឹស្តី និងការអនុវត្តផ្ទាល់ ទៅលើមេរៀនសំខាន់ៗជាច្រើន រួមមាន គោលការណ៍គ្រឹះរបស់ចលនាកាកបាទក្រហម ការវាយតម្លៃស្ថានភាពគ្រោះថ្នាក់ ការសង្គ្រោះជនរងគ្រោះថប់ដង្ហើម ការឃាត់ឈាម និងការរុំរបួស ការសង្គ្រោះករណីបាក់ឆ្អឹង រលាក គ្រោះថ្នាក់ចរន្តអគ្គិសនី និងការសន្លប់ ព្រមទាំងវិធីសាស្ត្រដឹកជញ្ជូនជនរងគ្រោះប្រកបដោយសុវត្ថិភាព។

សិក្ខាកាមទាំងអស់បានសម្តែងនូវក្តីរីករាយ និងប្តេជ្ញាចិត្តថានឹងនាំយកចំណេះដឹងទាំងនេះទៅប្រើប្រាស់ឱ្យកើតជាប្រយោជន៍ពិតប្រាកដ ក្នុងសង្គម និងការងារមនុស្សធម៌នាពេលខាងមុខ៕