(ភ្នំពេញ)៖ ចាប់ពីថ្ងៃទី១៣ ដល់ថ្ងៃទី១៧ ខែវិច្ឆិកា ឆ្នាំ២០២៦នេះ ព្រឹត្តិការណ៍ជាប្រវត្តិសាស្ត្រ យ៉ាងមហោឡារិក នឹងចូលមកអង្រួនរាជធានីភ្នំពេញបេះដូងនៃព្រះរាជាណាចក្រកម្ពុជា នោះគឺ​ព្រឹត្តិ​ការណ៍នៃកិច្ចប្រជុំកំពូលហ្វ្រង់កូហ្វូននី ឬហៅថាអង្គការប្រទេសនិយាយភាសាបារាំង លើកទី២០ និងព្រឹត្តិការណ៍អមមួយចំនួនទៀត។ មេដឹកនាំកំពូល គណៈប្រតិភូ និងអ្នកធ្វើធុរកិច្ច​មក​ពីប្រទេសចំនួន៧៩ប្រទេស ស្មើនឹងរាប់ពាន់នាក់ នឹងមានវត្តមាននៅកម្ពុជា ដើម្បីចូល​រួម​ព្រឹត្តិការណ៍មួយនេះ។

អង្គការហ្វ្រង់កូហ្វូនី បានចាប់ផ្តើមកំណើតរយៈពេល៥៦ឆ្នាំហើយ តែកម្ពុជាមិនធ្លាប់បានធ្វើជា​ម្ចាស់ផ្ទះនៃកិច្ចប្រជុំនេះម្តងណាឡើយ។ កម្ពុជា ទទួលបានសេចក្តីទុកចិត្ត និងប្រគល់ឱ្យធ្វើជា​ម្ចាស់ផ្ទះនៃកិច្ចប្រជុំនេះ កាលពីឆ្នាំ២០២៤ ក្នុងកិច្ចប្រជុំកំពូលនៅប្រទេសបារាំង។

តើអ្វីទៅជាអង្គការហ្វ្រង់កូហ្វូនី?

អង្គការហ្វ្រង់កូហ្វូនី ត្រូវបានបង្កើតឡើងនៅថ្ងៃទី២០ ខែមីនា ឆ្នាំ១៩៧០ ដោយឥស្សរជនកំពូល​៤អង្គ និងរូបរួមមាន៖ សម្តេចព្រះបរមរតនកោដ្ឋ នរោត្តម សីហនុ ដែលជាអតីតប្រមុខរដ្ឋកម្ពុជា, ប្រធានាធិបតីដំបូងរបស់សេណេហ្កាល់ លោក ឡេអូប៉ូល សេដា សង់ហ្គ័រ (Léopold Sédar Senghor), អតីតប្រធានា​ធិប​តីនី​ហ្សេ លោក អាម៉ានី ឌីយ៉ូរី (Hamani Diori)​ និងអតីតប្រធានាធិបតីទុយនីស៊ី លោក អាប៊ីប បួរហ្គីបា (Habib Bourguiba)។

គំនិតដំបូងនៃការបង្កើតអង្គការនេះឡើង គឺជាការធ្វើសហប្រតិបត្តិការ ខាងផ្នែកភាសា និងវប្ប​ធម៌ ដោយយកភាសាបារាំង ដើម្បី​​ពង្រឹង​នូវភាពចម្រុះនៃវប្បធម៌របស់​ប្រទេសនានា​ដែលប្រើ​ភាសា​បារាំងដូចគ្នា។ មួយឆ្នាំ​ក្រោយ​មក គឺនៅឆ្នាំ១៩៧០ នៅទីក្រុងនីយ៉ាម៉េ ប្រទេសនី​ហ្សេ អង្គ​ការ​មួយត្រូវបានកើតឡើង ហៅ​ថាទីភ្នាក់​ងារ​សហ​ប្រតិបត្តិការ​ការវប្បធម៌ និងបច្ចេកទេស។ ទីភ្នាក់ងារនេះ បានក្លាយទៅ​ជា​អង្គការអន្តរជាតិ​ហ្វ្រង់កូហ្វូនីនៅឆ្នាំ២០០៥ រហូតដល់សព្វថ្ងៃ​នេះ។ នៅឆ្នាំ២០០៥ មានរដ្ឋ និងរដ្ឋាភិបាលជាសមាជិកចំនួន៥៣។ សព្វថ្ងៃនេះ អង្គការអន្តរ​ជាតិហ្វ្រង់កូហ្វូនី មានសមាជិកជារដ្ឋ និងរដ្ឋាភិបាលចំនួន៩០ ក្នុងនោះមានរដ្ឋចំនួន៥៣ ជាសមា​ជិកពេញសិទ្ធិ ហើយរដ្ឋចំនួន៥ ជាសមាជិកបម្រុង និងរដ្ឋចំនួន៣២ ជាសមាជិកសង្កេតការណ៍ ប្រទេសទាំងអស់​ គឺមកពីគ្រប់ទ្វីបទាំង៥។

ប្រទេសកម្ពុជា បានចូលជាសមាជិកសង្កេតការណ៍ក្នុងខែវិច្ឆិកា ឆ្នាំ១៩៩១ និងជាសមាជិក​ពេញសិទ្ធិក្នុងខែតុលា ឆ្នាំ១៩៩៣។

+ គោលដៅ និងបេសកកម្មរបស់អង្គការហ្វ្រង់កូហ្វូនី៖

ពីដំបូងទី អង្គការនេះធ្វើត្រឹមតែសហប្រតិបត្តិការខាងផ្នែកភាសា និងវប្បធម៌ ប៉ុន្តែយូរឆ្នាំ​ក្រោយ​មក អង្គការនេះ បានពង្រីកបេសកកម្ម និង​គោលដៅរបស់ខ្លួន ដើម្បីឱ្យ​ក្លាយ​ទៅ​ជាទី​កន្លែង​មួយសម្រាប់កិច្ចសហប្រតិបត្តិការ​មិនត្រឹមតែខាងផ្នែកអប់រំប៉ុណ្ណោះទេ​តែជាកិច្ច​សហប្រតិ​បត្តិ​ការ​ខាងផ្នែកនយោបាយ សេដ្ឋកិច្ច និងការស្រាវជា។

ធម្មនុញ្ញរបស់ហ្វ្រង់កូហ្វូនី បានចែងពីបេសកកម្មរបស់ខ្លួនចំនួន៤ រួមមាន៖

បេសកកម្មទី១៖ ការលើកស្ទួយការប្រើប្រាស់ភាសាបារាំង លើកស្ទួយភាពចម្រុះខាង​ផ្នែក​វប្ប​ធម៌ និងភាសា គឺចង់ធ្វើឱ្យភាសាបារាំងនេះ ក្លាយទៅជាឧបករណ៍សម្រាប់​សម្រាប់​បង្ខិតប្រជា​ជន​នៅ​លើ​​លោក​ឱ្យ​​ខិត​ចូល​ចិត្តគ្នា និងបើកចំហទៅកាន់ពិភពលោក។

បេសកកម្មទី២៖ ការលើកស្ទួយសន្តិភាព ប្រជាធិបតេយ្យ និងសិទ្ធិមនុស្ស៖ នេះគឺជាទិដ្ឋភាព​ខាង​​នយោ​បាយ។ អង្គការហ្វ្រង់កូហ្វូនី គឺចង់ឱ្យក្លាយទៅជាលំហ​នៃការសន្ទនាគ្នា សាមគ្គីភាព​ជា​មួ​យ​គ្នា ធ្វើការងារការទូតបង្កាទប់ស្កាត់ជាមុនកុំឱ្យមានសង្គ្រាម​កើតឡើង ​ហើយប្រែ​ក្លាយ​អង្គ​ការនេះ ឱ្យទៅជាអង្គការមួយដែលមានសមត្ថភាពក្នុងការរួមចំណែកទៅដល់សន្តិភាព និងស្ថេរ​ភាព​ជា​អន្តរ​ជាតិ។

បេសកកម្មទី៣៖ គាំទ្រខាងផ្នែកអប់រំ បណ្ដុះបណ្ដាល និងការស្រាវជៀវ៖ បេសកកម្មនេះ គឺពាក់​ព័ន្ធទៅនឹងការអប់រំសិក្សាធិការ។ អង្គការនេះ មានគោលបំណងក្នុងការអភិវឌ្ឍធនធាន​មនុស្ស កាត់​បន្ថយគម្លាត និងបណ្ដុះបណ្ដាលក្មេងៗជំនាន់ក្រោយ ដើម្បីឱ្យមានសមត្ថភាព​ប្រឈម​ទៅ​នឹង​ការប្រែប្រួលផ្នែកសេដ្ឋកិច្ច និងផ្នែកបច្ចេកវិទ្យាទៅថ្ងៃអនាគត។

បេសកកម្មទី៤៖ បេសកកម្មចុងក្រោយនេះ ធ្វើយ៉ាងណាបង្កបរិយាកាសអំណោយផល​សម្រាប់​កិច្ចសហប្រតិបត្តិការខាងផ្នែកសេដ្ឋកិច្ច និងការអភិវឌ្ឍប្រកបដោយចេរភាព។ នេះគឺជាទិដ្ឋភាព​ខាងផ្នែកសេដ្ឋកិច្ច ដូច្នេះអង្គការនេះ មិនត្រឹមតែធ្វើជាសហគមន៍មួយ ដែលយកភាសា និង​វប្ប​ធម៌​​ជាគ្រឹះប៉ុណ្ណោះទេ ប៉ុន្តែថែមទាំងផ្ដល់នូវវិភាគទានរបស់ខ្លួន​សម្រាប់ការ​អភិវឌ្ឍខាង​ផ្នែក​សេដ្ឋ​កិច្ច និងជាវិបុលភាពមួយ​ដែលរួមគ្នាជាមួយ​ប្រជាពលរដ្ឋទាំងអស់នៅលើពិភពលោក។ ចុង​​ក្រោយ​បំផុតហ្វ្រង់កូហ្វូនី តែងតែផ្ដល់ការយកចិត្តទុកដាក់ជាពិសេស​ចំពោះយុវជន ចំពោះ​ស្ត្រី​និងចំពោះបច្ចេកវិទ្យាឌីជីថល។

អង្គការហ្វ្រង់កូហ្វូនី មានទីស្នាក់ការកណ្តាលនៅទីក្រុងប៉ារីស ប្រទេសបារាំង។ អគ្គលេខាធិការ​របស់​អង្គការបច្ចុប្បន្ន គឺលោកស្រី ល្វីស មូស៊ីគីវ៉ាបូ (Louise Mushikiwabo) ជាជនជាតិ​រវ៉ាន់ដា។ លោកស្រី បានកាន់តំណែងនេះ ពីរអាណត្តិរួចមកហើយ។ អាណត្តិទី១ ពីឆ្នាំ២០១៩ ដល់ឆ្នាំ២០២២ ហើយអាណត្តិទី២ ពីឆ្នាំ២០២៣ ដល់២០២៦។ ក្នុងកិច្ចប្រជុំកំពូលនៅកម្ពុជា ឆ្នាំ២០២៦នេះ នឹងត្រូវជ្រើសអគ្គលេខាធិការសម្រាប់អាណត្តិថ្មី។

+ អ្នកប្រើប្រាស់ភាសាបារាំង (២០២២)៖

យោងតាមរបាយការណ៍ឆ្នាំ២០២២ អ្នកនិយាយភាសាបារាំងមានចំនួន ៣២១លាននាក់ ត្រូវបានគេកំណត់ថាជាអ្នកចេះនិយាយភាសាបារាំងពិតប្រាកដ។

សម្រាប់អ្នកប្រើប្រាស់ភាសាបារាំងនៅអាស៊ីអាគ្នេយ៍ នៅកម្ពុជាមានចំនួន ៤៦៣ ០០០នាក់ គឺស្មើនឹង ៣ភាគរយនៃប្រជាជន, ឡាវមានចំនួន ២០៤ ០០០នាក់ ស្មើនឹង ៣ភាគរយ នៃប្រជាជន និងវៀតណាម មានចំនួន ៦៩៣ ០០០នាក់ គឺស្មើនឹង ១ភាគរយ។

+ សមាជិកភាពរបស់កម្ពុជា និងការធ្វើជាម្ចាស់ផ្ទះលើកដំបូងសម្រាប់ឆ្នាំ២០២៦៖

បើទោះបីសម្តេចព្រះបរមរតនកោដ្ឋ នរោត្តម សីហនុ ជាស្ថាបនិកនៃអង្គការប្រទេសនិយាយ​ភាសា​​បារាំងយ៉ាងណាក្តី តែកម្ពុជាមិនបានក្លាយជាសមាជិករបស់អង្គការនេះនៅពេលបង្កើត​ឡើងពីដំបូងនោះឡើយ។

បញ្ហាដែលកម្ពុជាមិនអាចចូលជាសមាជិកនៃអង្គការនេះ ទីមួយនៅឆ្នាំ១៩៧០ ដែលជាឆ្នាំ​បង្កើត​ភ្នាក់ងារ​សហប្រតិបត្តិការខាងផ្នែកវប្បធម៌ និងបច្ចេក​ទេសនោះ គឺជាឆ្នាំមានរដ្ឋប្រហារ​នៅកម្ពុជា (១៨ មីនា ១៩៧០) តែម្ដង។ បន្ទាប់មក គឺមានសង្គ្រាម បន្ទាប់ពីសង្គ្រាម​ កម្ពុជា ជួប​នូវ​សោកនាដកម្មនៃរបបប្រល័យពូជសាសន៍។ ក្រោយបានរំដោះ​ពីរបប​ប្រល័យពូជសាសន៍​ហើយ អង្គការសហប្រជាជាតិ បានដាក់ទណ្ឌកម្មខាងផ្នែកសេដ្ឋកិច្ច​លើកម្ពុជាអស់រយៈ​ពេល​១២ឆ្នាំ។

លុះកម្ពុជា បានទទួលបានសន្តិភាព និងធ្វើសមាហរណកម្មឡើងវិញនៅ​ក្នុងកិច្ចការ​ពិភព​លោក​​នោះ ជាពិសេសបន្ទាប់ពីការបោះឆ្នោតដែលឃ្លាំមើលដោយអង្គការសហប្រជាជាតិ ដែលបេស​កកម្ម​ពេលនោះហៅថា អ៊ុនតាក់ នៅឆ្នាំ១៩៩៣ កម្ពុជាបានសម្រេចចិត្តប្រែក្លាយ​ខ្លួន​ទៅជា​សមា​ជិកទីភ្នាក់ងារសហប្រតិបត្តិការខាងផ្នែកវប្បធម៌ និងបច្ចេកវិទ្យានៅ​ឆ្នាំ១៩៩៣​តែម្តង។

ដោយមើលឃើញថា កម្ពុជាមានភាពសកម្មចាប់តាំងពីសមាជិកភាព​របស់ខ្លួននៅគ្រប់វេទិកា​ទាំង​អស់​របស់អង្គការនេះ កម្ពុជាត្រូវបានជ្រើសរើសជាឯកច្ឆន្ទកាលពីឆ្នាំ២០២៤ ដើម្បីធ្វើជា​ម្ចាស់​ផ្ទះ​នៃ​កិច្ចប្រជុំកំពូលនៃប្រមុខរដ្ឋ ប្រមុខរដ្ឋាភិបាលនៃប្រទេស និងរដ្ឋាភិបាលជាសមា​ជិក​លើកទី២០ នៅកម្ពុជា។ សេចក្ដីសម្រេចនេះ គឺជាការបង្ហាញនូ​វ​ទំនុក​ចិត្តរបស់សមាជិករបស់​អង្គការនេះ ចំពោះតួនាទីដ៏សំខាន់របស់កម្ពុជាក្នុង​ក្រុមគ្រួសារ​របស់​ហ្វ្រង់កូហ្វូនី។

កិច្ចប្រជុំហ្វ្រង់កូហ្វូនីនៅកម្ពុជា នឹងត្រូវធ្វើឡើងក្រោមមូលបទ «រួមគ្នាបន្តកសាងសន្តិភាព​ដើម្បី​វិបុល​ភាពរួម និងស្ថិរភាពយូរអង្វែង»។ ក្នុងមូលបទនេះ មានគំនិត ឬគុណតម្លៃធំៗបី៖ ទី១ សន្តិ​ភាព ទី២ វិបុលភាព និងទី៣ ស្ថិរភាព។ មូលបទនេះ​ គឺយកចេញពីបទពិសោធន៍ និងពីប្រវត្តិ​របស់​កម្ពុជាផ្ទាល់តែម្តង។ ប្រវត្តិរបស់​កម្ពុជា ​គឺឆ្លងកាត់ការលំបាកច្រើនណាស់។ ក្នុងរយៈពេល ៣០ឆ្នាំអតីតកាលរបស់កម្ពុជា កម្ពុជាមានការ​រីករាលដាលពី​សង្គ្រាម​នៅវៀតណាម​នៅចុង​ទសវត្សរ៍​ទី៦០ មានរដ្ឋប្រហារ មានសង្គ្រាមស៊ីវិល មាន​​របបប្រល័យពូជសាសន៍ ទម្រាំតែកម្ពុជា​បានទទួលសន្តិភាពពេញលេញដោយគុណ​នៃនយោ​បាយឈ្នះ-ឈ្នះ របស់សម្ដេចតេជោ ហ៊ុន សែន។ ៣០ឆ្នាំនៃទំព័រប្រវត្តិសាស្ត្រដ៏ខ្មៅងងឹតនេះ គឺ​បាន​ធ្វើឱ្យ​កម្ពុជាស្គាល់​ច្បាស់ណាស់​នូវ​តម្លៃនៃសន្តិភាព។

កិច្ចប្រជុំហ្វ្រង់កូហ្វូនី នៅកម្ពុជា នឹងអនុម័តនូវឯកសារចំនួន៣រួមមាន៖

ទី១៖ ជាសេចក្តីថ្លែង​ការណ៍​ទីក្រុងភ្នំពេញ។ សេច​ក្តី​​ថ្លែងការណ៍ជាសេចក្តីថ្លែងការណ៍​ខាង​នយោបាយ​បញ្ជាក់អំពី​ជំហរ​របស់អង្គការនេះ បញ្ជាក់ពីការងាររបស់អង្គការនេះ ទិសដៅ គុណតម្លៃដែលអង្គការនេះ ខំលើកស្ទួយ និងទិសដៅ​អនាគតសម្រាប់អង្គការនេះ។

ទី២៖ ជាសេចក្តីសម្រេចស្តីពីស្ថានភាពវិបត្តិ ការចាកចេញពីវិបត្តិ និងការពង្រឹង​សន្តិ​ភាព​ក្នុងតំបន់ប្រើប្រាស់ភាសាបារាំងដូចគ្នា។ ចង់ជម្រាបជូនថាស្ថានភាពវិបត្តិនៅគ្រប់ទ្វីបទាំងអស់ ហើយពិភាក្សាគ្នាអំពីមធ្យោបាយដើម្បីចាកចេញពីវិបត្តិទាំងនោះ និងការពង្រឹងសន្តិភាព។

ទី៣៖ សេចក្តីអំពាវនាវទីក្រុងភ្នំពេញស្តីពីការការពារបេតិកភណ្ឌវប្បធម៌ និង​ការលើកកម្ពស់ភាព​ចម្រុះ​នៃវប្បធម៌។ ប្រទេសទាំងអស់មានវប្បធម៌ខុសៗគ្នា ហើយការ​ការពារ​នេះ គឺជាភារកិច្ច​របស់​មនុស្សជាតិទាំងអស់គ្នា។

ព្រឹត្តិការណ៍ហ្វ្រង់កូហ្វូនីនៅកម្ពុជា ក្រៅអំពីការប្រជុំទាំងថ្នាក់រដ្ឋមន្ត្រី ទាំងថ្នាក់​ប្រមុខ​រដ្ឋរដ្ឋា​ភិបាល​នោះ គឺមានព្រឹត្តិការណ៍អមមួយចំនួនទៀត រួមមានការរៀបចំហ្វ្រង់កូតិច (Francotech)។ ហ្វ្រង់​កូតិចនេះ គឺប្រមូលផ្ដុំសហគ្រិន តំណាងខាងផ្នែកវិស័យឯកជន គឺក្រុមហ៊ុនថ្មីៗកើត​ឡើងថ្មី​ហៅថា Start-up មានអង្គការក្រៅរដ្ឋាភិបាល។ ហ្វ្រង់កូតិច​នេះ អ្នកដែលរៀបចំចូលរួម​គឺ​មានរហូតដល់ ៤៦០០នាក់។ ក្រៅពីនោះ ក៏មានកិច្ចប្រជុំមួយទៀតហៅថា កិច្ចប្រជុំ​សហគ្រិន​អ្នក​និយាយភាសាបារាំង មាន ១២០០នាក់ ចូលរួមមកពី ៧២ប្រទេស។

ក្នុងព្រឹត្តិការណ៍នេះ ក៏មានព្រឹត្តិការណ៍​មួយទៀត គឺភូមិ​ហ្វ្រង់​កូហ្វូនី (Village de la Francophonie) ធ្វើនៅសួនច្បារមុខវត្តបទុមវតី មកដល់​ម៉ោង​នេះ បានរៀបចំ ១៣០ស្តង់រួចទៅហើយ។ ១៣០ពន្លា ដែលក្នុងនោះ ៧៣សម្រាប់ប្រទេស ៥៦ កន្លែងនេះ គឺជាកន្លែងដែលនឹងដាក់បង្ហាញផលិតផលពីប្រទេសនានាដែលគេមក រួមមានកា​រ​សម្ដែងសិល្បៈ មានការបង្ហាញអំពីសក្ដានុពលខាងផ្នែកទេសចរណ៍ ហើយក៏មានស្តង់រហូតទៅ​ដល់៣០ សម្រាប់បង្ហាញម្ហូបអាហាររបស់ប្រទេសនីមួយៗ។

+ គណៈប្រតិភូចូលរួមនៅកម្ពុជា៖
មកដល់ពេលនេះ មានគណៈប្រតិភូប្រទេសជាច្រើន បានបញ្ជាក់ពីការចូលរួមក្នុង​កិច្ចប្រជុំនៅ​កម្ពុជា ខណៈគណៈប្រតិភូខ្លះ បានអញ្ជើញមកដល់កម្ពុជារួចហើយ។ ក្នុងចំណោមប្រទេស និងរដ្ឋាភិបាលជា​សមាជិកទាំង៩០ របស់អង្គការនេះ មានគណៈប្រតិភូ ៧៩ប្រទេសរួច​ហើយ បានបញ្ជាក់​អំពី​ការ​ចូលរួម ហើយនឹងមានជាង ១០០០ប្រតិភូ ដែលក្នុងនោះ គឺ៩០០ ប្រតិភូនឹង​ចូល​រួមនៅក្នុង​កិច្ចប្រជុំទាំងកិច្ចប្រជុំ ថ្នាក់រដ្ឋមន្ត្រី និងកិច្ចប្រជុំថ្នាក់កំពូល។ មានប្រមុខរដ្ឋ ប្រមុខ​​រដ្ឋាភិបាល​ចំនួន ២០ប្រទេសមកចូលរួម។ ឧបនាយករដ្ឋមន្ត្រី រដ្ឋមន្ត្រី និងអនុរដ្ឋមន្ត្រី​ចំនួន២៦ ដែលជាប្រធាន​គណៈ​ប្រតិភូមកចូលរួម។ បានចុះបញ្ជីអ្នកកាសែតចំនួន ១២០០នាក់ រួចទៅហើយ ដែលក្នុងនោះ​មានជិត ៤០០ជាអ្នកកាសែតបរទេស។ នេះអត់ទាន់​រាប់​សមាជិកទាំងឡាយដែលជាបុគ្គលិករបស់គណៈប្រតិភូទេ ដែលមកតាមជាមួយ​គណៈប្រតិ​ភូធំៗ។ ក្នុងនោះប្រទេសកុងហ្គោ ដែលជា​ប្រទេស​នៅ​អាហ្វ្រិកដែលមានប្រជាជន​រហូតទៅដល់​ជាង ១០០លាននាក់ ហើយជាប្រទេស​និយាយ​ភាសាបារាំងធំជាងគេ គឺសមាជិកគណៈ​ប្រតិភូមានរហូតដល់ ២១១នាក់។ ប្រទេស​វៀតណាម ដឹកនាំដោយអគ្គលេខាធិការ និងជាប្រធានរដ្ឋលោក តូ ឡឹម មានសមាជិក ១៥៦នាក់។ ប្រទេសកាណាដាដែលដឹកនាំដោយ​នាយករដ្ឋមន្ត្រី នឹងមានសមាជិកគណៈ​ប្រតិភូ​ចំនួន ១២៤នាក់។

+ ការរំពឹងទុករបស់កម្ពុជា ក្នុងការរៀបចំព្រឹត្តិការណ៍កិច្ចប្រជុំហ្វ្រង់កូហ្វូនីលើកទី២០៖

ការដែលសមាជិកអង្គការហ្វ្រង់កូហ្វូនី បានគាំទ្រជាឯកឆន្ទឱ្យកម្ពុជាធ្វើជាម្ចាស់ផ្ទះនេះ គឺជាការ​បង្ហាញ​​នូវ​ទំនុកចិត្តដ៏ខ្លាំង ហើយនិងបង្ហាញការទទួលស្គាល់ចំពោះតួនាទី និងវិភាគទានរបស់​កម្ពុជានៅ​ក្នុង​អង្គការនេះ។ ជោគជ័យនៃកិច្ចប្រជុំនេះ គឺនឹងទៅជាជោគជ័យរួម ពីព្រោះជោគ​ជ័យ​នេះ គឺត្រូវការ​នូវ​ការគាំទ្រ និងការប្តេជ្ញាចិត្តរបស់រដ្ឋ និងរដ្ឋាភិបាលដែលជាសមាជិក។

កម្ពុជា ប្តេជ្ញាចិត្តធ្វើឱ្យកិច្ចប្រជុំកំពូលនេះ ក្លាយទៅជាជោគជ័យមួយ ហើយវានឹងផ្តល់នូវ កិត្តិ​យស​​ដ៏ធំផងសម្រាប់កម្ពុជា ហើយក៏បង្ហាញឱ្យពិភពលោកមើលឃើញថា កម្ពុជាមានការទទួល​ខុសត្រូវ មាន​សមត្ថភាពនៅក្នុងការរៀបចំចាត់ចែងកិច្ចប្រជុំប្រតិបត្តិការដ៏ធំសម្បើមនេះ។ ហើយ​ក៏វានឹង​លើក​តួនាទី និងទីតាំងរបស់កម្ពុជានៅក្នុងឆាកអន្តរជាតិ។ ចំណុចសំខាន់មួយ​ទៀត គឺវា​នឹងផ្តល់​នូវកាលានុវត្តភាពច្រើនខាងផ្នែកសេដ្ឋកិច្ច វប្បធម៌ ទេសចរណ៍ ហើយក៏ដូច​ជា​ផ្តល់​កិត្តិយស និង​កិត្យានុភាពរបស់ជាតិ។

កម្ពុជា មានក្តីរំពឹងថា កិច្ចប្រជុំកំពូលនេះ នឹងធ្វើឱ្យ​សម្រេចនូវមហិច្ឆតារួមរបស់ប្រទេសជា​សមា​ជិកហ្វ្រង់កូហ្វូនី ក៏ដូចជារបស់អង្គការហ្វ្រង់កូហ្វូនី។ បានន័យ​ថា កម្ពុជានឹងធ្វើឱ្យអង្គការនេះ ក្លាយ​ទៅជាអង្គការមួយដែលមានប្រសិទ្ធភាពជាងមុន ពង្រឹង​ប្រសិទ្ធ​ភាពរបស់អង្គការនេះ, ធ្វើ​ឱ្យអង្គការនេះ ខិតកាន់តែគៀកជាមួយប្រជាពលរដ្ឋទូទៅ ផ្តល់សារៈ​សំខាន់ការយកចិត្ត​ទុកដាក់​ចំពោះបំណងប្រាថ្នារបស់យុវជន និងរបស់ស្ត្រី ពីព្រោះសព្វថ្ងៃនេះ ពិភពលោកខិតខំជំរុញ​លើក​ស្ទួយ​ខ្លាំងណាស់ចំពោះតួនាទីរបស់ស្ត្រី ហើយមានការគិតគូរ​ខ្លាំង​ចំពោះយុវជនដែលជាអ្នក​ត្រូវ​ទទួលរ៉ាប់រងស្នងពីជំនាន់បច្ចុប្បន្ននេះ ក្នុងដំណាក់កាលពេលក្រោយៗទៀត។

កម្ពុជា ក៏មានក្តីរំពឹងដែរថា នឹងធ្វើឱ្យអង្គការហ្វ្រង់កូហ្វូនី ក្លាយទៅជាអង្គការមួយដែល​មាន​សមត្ថភាពក្នុងការឆ្លើយតបដោយជាក់ស្តែងចំពោះការប្រឈមរបស់សម័យកាលនេះ។ អ៊ីចឹង​កម្ពុជានឹងខំរួមចំណែកធ្វើ​យ៉ាង​ម៉េចឱ្យហ្វ្រង់កូហ្វូនីនេះវិវត្តពីគ្រាន់តែថា លើកអំពីគុណតម្លៃ​ និងធ្វើសេចក្តីថ្លែងការណ៍ សេចក្តី​ប្រកាសនានា ទៅជាហ្វ្រង់កូហ្វូនីមួយ ធ្វើសកម្មភាព​ ដែល​មាន​កិច្ចសហ​ប្រតិបត្តិការជាមួយគ្នា មានសាមគ្គីភាពជាមួយគ្នា និងផលិតនូវលទ្ធផលជាក់​ស្តែង​សម្រាប់​ផល​ប្រយោជន៍របស់ប្រជាជាតិទាំងឡាយ។

ដូច្នេះគោលគំនិតរបស់កម្ពុជា គឺធ្វើឱ្យអង្គការហ្វ្រង់កូហ្វូនី ក្លាយទៅជាលំហមួយសម្រាប់​ការ​សន្ទនា ​និងកិច្ចសហប្រតិបត្តិការរវាងរដ្ឋ និងរដ្ឋាភិបាលដែលមកពីទ្វីបទាំងប្រាំ។ ព្រឹត្តិការណ៍​នេះ ​ក៏​ជាឱកាសមាសមួយសម្រាប់កម្ពុជា ក្នុងការធ្វើឱ្យពិភពលោកដែលមកនេះ ឱ្យគេស្គាល់​កម្ពុជា កម្ពុជាជាប្រទេសរបៀបម៉េច កម្ពុជាមានសក្ដានុពលរបៀបម៉េច កម្ពុជា​ជួប​បញ្ហា​របៀប​ម៉េច។

បន្ថែមពីលើនេះ ក្នុងព្រឹត្តិការណ៍ជាប្រវត្តិសាស្ត្រដែលប្រមុខរដ្ឋ ប្រមុខរដ្ឋាភិបាលជួបគ្នា រដ្ឋមន្ត្រី រដ្ឋមន្ត្រីជួបគ្នា អ៊ីចឹងកម្ពុជានឹងរក​នូវការគាំទ្រខាងផ្នែកការទូតសម្រាប់កិច្ចការទាំងឡាយ​​ដែល​ពាក់ព័ន្ធទៅសន្តិភាព និងអធិប​តេយ្យ​ជាតិរបស់ជាតិ។ តាមរយៈការជជែកដេញដោលគ្នា ពិភាក្សា​គ្នា ការសម្រេចចិត្តនានា និង​ការ​រៀប​ចំនូវព្រឹត្តិការណ៍ភូមិហ្វ្រង់កូហ្វូនី ឬក៏ហ្វ្រង់កូហ្វូនី​តិច ឬក៏កិច្ចប្រជុំសហគ្រិន​ហ្វ្រង់​កូហ្វូន​នេះ អាចរកទីផ្សារថ្មី អាចទាក់ទាញនូវវិនិយោគថ្មី អាច​លើកស្ទួយវិស័យទេសចរណ៍ វប្បធម៌របស់កម្ពុជា៕