ឱកាសពិសេសទទួលបានការងារភ្លាមៗ សម្រាប់ពលរដ្ឋនៅស្រុកអូរជុំ តាមរយៈវេទិកាការងារ សន្តិសុខសង្គម និងការបណ្តុះបណ្តាលវិជ្ជាជីវៈ
12-11-2026 16:15
(រតនគិរី)៖ ក្នុងស្មារតីយកចិត្តទុកដាក់ខ្ពស់ចំពោះជីវភាពរស់នៅរបស់ប្រជាពលរដ្ឋ ក្រសួងការងារនិងបណ្តុះបណ្តាលវិជ្ជាជីវៈ នៅតែបន្តយុទ្ធនាការរៀបចំវេទិកាការងារ សន្តិសុខសង្គម និងការបណ្តុះបណ្តាលវិជ្ជាជីវៈយ៉ាងសកម្មជារៀងរាល់សប្ដាហ៍ ជាក់ស្ដែងនាព្រឹកថ្ងៃទី១២ ខែវិច្ឆិកា ឆ្នាំ២០២៦នេះ វេទិកាការងារត្រូវបានរៀបចំឡើងនៅក្នុងបរិវេណសាលាស្រុកអូរជុំ ខេត្តរតនគិរី ដោយបានពាំនាំឱកាសការងារជាង ២០០០ កន្លែង និងអត្ថប្រយោជន៍ ប.ស.ស. និងកម្មវិធី TVET ផ្សព្វផ្សាយជូនប្រជាពលរដ្ឋ ជាពិសេសអតីតពលករមកពីប្រទេសថៃ និងយុវជនកំពុងរកការងារធ្វើប្រមាណជាង៥០០នាក់។
ថ្លែងក្នុងវេទិកានេះ លោក ទេព ណាវី រដ្ឋលេខាធិការក្រសួងការងារនិងបណ្តុះបណ្តាលវិជ្ជាជីវៈ បានលើកឡើងថា តាមរយៈវេទិកានេះបាននាំឱកាសការងារទទួលបានប្រាក់ឈ្នួលសមរម្យយ៉ាងច្រើន ដែលការងារមានតាមវិស័យកសិកម្ម កសិឧស្សាហកម្ម សេវាកម្ម ទេសចរណ៍ជាដើម ជាពិសេសភាគច្រើនមានមូលដ្ឋាននៅក្នុងខេត្តរតនគិរីស្រាប់ ដូច្នេះសូមប្រជាពលរដ្ឋ អតីតពលករមកពីប្រទេសថៃ និងយុវជនកំពុងរកការងារអាចធ្វើការចុះឈ្មោះ សម្ភាសបានគ្រប់ៗគ្នា ដើម្បីទទួលបានការងារភ្លាមៗ។ ក្រៅពីប្រាក់ឈ្នួលសមរម្យ និងការយកចិត្តទុកដាក់នេះ ការងារក្នុងស្រុកក៏ទទួលបានអត្ថប្រយោជន៍ជាច្រើន ជាពិសេសអត្ថប្រយោជន៍ពី ប.ស.ស. រួមមាន៖ ផ្នែកហានិភ័យការងារ ផ្នែកថែទាំសុខភាព និងផ្នែកសោធនចាប់ពីអាយុ៦០ឆ្នាំទៅ ព្រមទាំងផ្តល់សុភមង្គលក្នុងគ្រួសារផងដែរ។ ផ្ទុយទៅវិញ ការងារចំណាកស្រុកខុសច្បាប់អាចប្រឈមនឹងហានិភ័យសុវត្ថិភាព ការកេងប្រវ័ញ្ចកម្លាំងពលកម្ម ខ្វះការគាំពារសុខភាព ការរើសអើង និងមិនអាចរស់នៅជួបជុំក្រុមគ្រួសារ។
ក្រៅពីផ្សព្វផ្សាយឱកាសការងារ លោកក៏បានលើកទឹកចិត្តដល់ប្រជាពលរដ្ឋចុះឈ្មោះចូលរៀនជាមួយកម្មវិធី TVET 1.5M ដោយឥតគិតថ្លៃ ដូចជា៖ ផ្នែកសំណង់ ជួសជុលគ្រឿងម៉ាស៊ីន គ្រឿងអគ្គិសនី បរិក្ខារត្រជាក់ ដុតនំ ឆុងកាហ្វេ និងផ្នែកសាឡនជាដើម ដើម្បីអាចប្រើប្រាស់ជំនាញទាំងនេះបង្កើតមុខរបរដោយខ្លួនឯង ឬ រកការងារធ្វើទទួលបានប្រាក់ឈ្នួលខ្ពស់ជាងមុន។
ក្នុងករណីប្រជាពលរដ្ឋចង់ទៅធ្វើការនៅក្រៅប្រទេស លោករដ្ឋលេខាធិការ បានលើកទឹកចិត្តឱ្យប្រជាពលរដ្ឋចុះឈ្មោះជាមួយនឹងក្រុមហ៊ុន បញ្ជូនពលករស្របច្បាប់ ដែលនឹងទទួលបានប្រាក់ឈ្នួលខ្ពស់ និងមានការការពារសិទ្ធិនិងអត្ថប្រយោជន៍ពេញលេញ។ យ៉ាងណាមិញ ប្រសិនបើប្រជាពលរដ្ឋចង់សាកសួរព័ត៌មានបន្ថែម សូមទាក់ទងទៅលេខ Hotline ១២៩៧ សម្រាប់ព័ត៌មានពីឱកាសការងារ ឬ រៀនជំនាញវិជ្ជាជីវៈ និងលេខ ១២៨៦ សម្រាប់ព័ត៌មានពាក់ព័ន្ធនឹង ប.ស.ស.។
សូមបញ្ជាក់ថា ឱកាសការងារទាំងនេះត្រូវបានផ្តល់ដោយក្រុមហ៊ុន ថាកូ អាហ្រ្គី, ធនាគារ ABA (ខេត្តរតនគិរី), រោងចក្រ ស៊ិនគី អឹភែរឹល (ខេមបូឌា) ឯ.ក, និង ធនាគារ វីង (ខេមបូឌា) ម.ក ដែលមានតម្រូវការការងារសរុបជាង ២០០០ កន្លែង៕
