ការតាំងបង្ហាញគំរូប្រាសាទខ្មែរដែលរងការបំផ្លាញនៅភូមិហ្រ្វង់កូហ្វូនី ជាតឹកតាងប្រវត្តិសាស្ត្របង្ហាញដល់អន្តរជាតិពីសោកនាដកម្មនៃទង្វើឈ្លានពានរបស់យោធាថៃ
12-11-2026 19:48
(ភ្នំពេញ)៖ ភូមិហ្រ្វង់កូហ្វូនី គឺជាព្រឹត្តិការណ៍អមមួយ នៃកិច្ចប្រជុំកំពូលហ្វ្រង់កូហ្វូនី ដែលកម្ពុជាធ្វើជាម្ចាស់ផ្ទះ ចាប់ពីថ្ងៃទី១៤ ដល់ថ្ងៃទី១៦ ខែវិច្ឆិកា ខាងមុខនេះ។ ភូមិហ្រ្វង់កូហ្វូនី រៀបចំឡើងក្រោមប្រធាន «ស្នាមញញឹមខ្មែរ ស្នាមញឹមហ្រ្វង់កូហ្វូនី» ក្នុងនោះក៏មានតាំងបង្ហាញគំរូគោបុរៈនៃប្រាង្គប្រាសាទព្រះវិហារ ប្រាសាទតាមាន់ និងប្រាសាទតាក្របី ដែលរងការបំផ្លាញដោយសារយោធាថៃឈ្លានពាន កាលពីឆ្នាំ២០២៥ កន្លងទៅ ដើម្បីបង្ហាញឱ្យភ្ញៀវអន្តរជាតិបានទស្សនា ចាប់ពីថ្ងៃទី១៣ ដល់ថ្ងៃទី១៧ ខែវិច្ឆិកា ឆ្នាំ២០២៦។
យុវជន ហុង ម៉េងហ្វា ជាអ្នកខេត្តបាត់ដំបង បានបង្ហាញការរីករាយដែលកម្ពុជា មានឱកាសធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនី លើកទី២០។ ជាពិសេសការរៀបចំឱ្យមានភូមិហ្វ្រង់កូហ្វូនី នៅបរិវេណដ៏ធំសម្រាប់ឱ្យភ្ញៀវកិត្តិយសជាតិ និងអន្តរជាតិ អាចមកចូលទស្សនាបានហើយអាចមកស្គាល់អំពីប្រទេសខ្មែរយើងកាន់តែច្បាស់ មានទាំងវប្បធម៌អរិយធម៌ក៏ដូចជាសំណង់ប្រាសាទនានា ដែលបានដាក់តាំងបង្ហាញនៅក្នុងបរិវេណនៅទល់មុខវត្តបទុមវត្តីនេះតែម្ដង។
យុវជន ហុង ម៉េងហ្វា បានសង្កត់ធ្ងន់ថា៖ «សម្រាប់ខ្ញុំផ្ទាល់ខ្ញុំពិតជាមានអារម្មណ៍ក្តុក្ដួលមែនទែននៅពេលដែលគេបានវាយប្រហារមកកាន់ប្រទេសរបស់យើងក៏ដូចជាបំផ្លាញនូវប្រសាទ របស់យើងនៅក្នុងអំឡុងងពេលនៅថ្ងៃខាងមុខនេះ ខ្ញុំពិតជាមានក្តីសប្បាយរាករាយមែនទែនដែលខ្មែរយើងអាចយកប្រាសាទនឹងមកដាក់តាំងនៅក្នុងមុខវត្តបទុមវត្តី ដើម្បីឱ្យភ្ញៀវអន្តរជាតិទាំងអស់ បានមកទស្សនាទៅលើរូបរាងរបស់ប្រសាទដែលត្រូវបានគេវាយប្រហារ ក៏ដូចជាដឹងថាប្រាសាទនេះ គឺជាប្រាសាទរបស់ខ្មែរ ហើយនៅលើទឹកដីខ្មែរតែម្ដង»។
យុវជន ហុង ម៉េងហ្វា បានគូសបញ្ជាក់ថា ដូច្នេះក្នុងនាមជាយុវជនក៏ដូចជាជនជាតិខ្មែររួមតែមួយ យើងនឹងធ្វើការបង្ហាញទៅលើគ្រប់ចំណុចទាំងអស់ ដើម្បីបញ្ជាក់ភាពស្អាតស្អំរ
បស់ខ្មែរទាំងអស់។
ដោយឡែកកញ្ញា អឿង សុវណ្ណម៉ីលីង បានថ្លែងថា បានបង្ហាញអារម្មណ៍ថារំភើបចំពោះព្រឹត្តិការណ៍ប្រវត្តិសាស្ត្រដែលកម្ពុជា ធ្វើជាម្ចាស់ផ្ទះរៀបចំកិច្ចប្រជុំហ្វ្រង់កូហ្វូនី លើកទី២០ ព្រមទាំងបានរៀបចំភូមិហ្វ្រង់កូហ្វូនី ដោយមានការតាំងបង្ហាញប្រាសាទបុរាណខ្មែរ ដែលទទួលរងការវាយប្រហារក្នុងអំឡុងសង្គ្រាមឈ្លានពាន។
កញ្ញា អឿង សុវណ្ណម៉ីលីង បានគូសញ្ជាក់ថា៖ «ការតាំងរូបភាពប្រាង្គប្រាសាទខ្មែរ គឺឆ្លុះបញ្ចាំងភាពស្អាតស្អំមួយដោយយើងបង្ហាញអ្វីដែលជារបស់យើង ដែលត្រូវបានគេ (យោធាថៃ) បំផ្លាញដើម្បីបង្ហាញទៅកាន់ពិភពលោកថាកម្ពុជា ជាជនរងគ្រោះ»។
ភូមិហ្វ្រង់កូហ្វូនី នឹងចាប់បើកឱ្យភ្ញៀវទេសចរជាតិ និងអន្តរជាតិចូលទស្សនា ពីថ្ងៃទី១៣ រហូតដល់ថ្ងៃទី១៧ ខែវិច្ឆិកា ឆ្នាំ២០២៦ ដោយមានការបង្ហាញលើសិល្បៈ វប្បធម៌ កិច្ចសហប្រតិបត្តិការ និងសាមគ្គីភាព រវាងព្រះរាជាណាចក្រកម្ពុជា និងបណ្តាប្រទេសនិយាយភាសាបារាំង តាមរយៈការរៀបចំជាពន្លាជាតិ, ស្តង់ពិព័រណ៍, ស្តង់ពិព័រណ៍ម្ហូបអាហារ, ការសម្តែងសិល្បៈចម្រុះប្រចាំថ្ងៃ និងការរៀបចំជាកិច្ចសន្ទនា សិក្ខាសាលា លើប្រធានបទគន្លឹះៗ មានជាអាទិ៍ ការលើកកម្ពស់វិស័យទេសចរណ៍ ការអប់រំ យុវជន សមភាពយេនឌ័រ សន្តិភាព ការអភិរក្សបេតិកភណ្ឌវប្បធម៌។ល។
សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា អមដំណើរដោយលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត និងលោកស្រីអគ្គលេខាធិការ នៃអង្គការ OIF នឹងអញ្ជឹងចូលរួមជាគណៈធិបតីបើកព្រឹត្តិការណ៍ «ភូមិហ្រ្វង់កូហ្វូនី» ជាផ្លូវការនៅល្ងាចថ្ងៃទី១៣ ខែវិច្ឆិកា ឆ្នាំ២០២៦៕
