(ភ្នំពេញ)៖ លោក វង សូត អនុប្រធានទី២រដ្ឋសភា និងជាប្រធានក្រុមមិត្តភាពរដ្ឋសភាបេឡារូស-កម្ពុជា នារសៀលថ្ងៃទី១២ ខែវិច្ឆិកា ឆ្នាំ២០២៦នេះ បានអញ្ជើញទទួលជួបពិភាក្សាការងារតាមប្រព័ន្ធវីដេអូជាមួយលោក អ៉ីវ៉ាន ម៉ាឃែវីច (Ivan Markevich) ប្រធានគណៈកម្មការកសិកម្ម និងជាប្រធានក្រុមមិត្តភាពរដ្ឋសភាបេឡារូស-កម្ពុជា។

ក្នុងជំនួបនេះលោក វង សូត បានស្នើឱ្យភាគីបេឡារូសបន្តជំរុញការពង្រឹងកិច្ចសហប្រតិបត្តិការរវាងស្ថាប័ននីតិប្បញ្ញត្តិនៃប្រទេសទាំងពីរ តាមរយៈការលើកកម្ពស់ការទូតសភា ការផ្លាស់ប្តូរទស្សនកិច្ច និងបទពិសោធន៍រវាងក្រុមមិត្តភាពរដ្ឋសភា ព្រមទាំងជំរុញការបណ្តុះបណ្តាលធនធានមនុស្ស និងការផ្តល់អាហារូបករណ៍លើវិស័យសំខាន់ៗ។

លោកបានរំលឹកថា កម្ពុជា និងបេឡារូសបានភ្ជាប់ទំនាក់ទំនងការទូត និងកិច្ចសហប្រតិបត្តិការជាមួយគ្នាតាំងពីឆ្នាំ១៩៩៥មក ហើយទំនាក់ទំនងនេះត្រូវបានពង្រឹង និងពង្រីកជាបន្តបន្ទាប់ តាមរយៈការផ្លាស់ប្តូរទស្សនកិច្ច ការជួបពិភាក្សារវាងថ្នាក់ដឹកនាំ និងការចុះកិច្ចព្រមព្រៀងលើវិស័យសំខាន់ៗជាច្រើន។

ជាមួយគ្នានេះលោកបានលើកទឹកចិត្តឱ្យភាគីបេឡារូសជួយផ្សព្វផ្សាយសក្តានុពលរបស់កម្ពុជា ដើម្បីទាក់ទាញអ្នកវិនិយោគលើវិស័យកសិកម្ម ឧស្សាហកម្មគ្រឿងយន្តកសិកម្ម និងជំរុញអ្នកទេសចរបេឡារូសឱ្យមកទស្សនានៅកម្ពុជាកាន់តែច្រើន។

លោក វង សូត ក៏បានស្នើឱ្យភាគីបេឡារូសបន្តគាំទ្រដល់ការបណ្តុះបណ្តាលជំនាញបច្ចេកទេស និងការអភិវឌ្ឍធនធានមនុស្សនៅកម្ពុជា តាមរយៈការផ្តល់អាហារូបករណ៍លើវិស័យបច្ចេកវិទ្យាកសិកម្ម វិទ្យាសាស្ត្រ បច្ចេកវិទ្យាព័ត៌មាន និងនីតិកម្ម។

ជាការឆ្លើយតប លោក អ៉ីវ៉ាន ម៉ាឃែវីច បានបញ្ជាក់ពីការប្តេជ្ញាចិត្តរបស់ភាគីបេឡារូសក្នុងការបន្តពង្រឹង និងពង្រីកកិច្ចសហប្រតិបត្តិការទ្វេភាគី ជាពិសេសលើវិស័យពាណិជ្ជកម្ម សេដ្ឋកិច្ច វិនិយោគ អប់រំ វប្បធម៌ និងកសិកម្ម។ ភាគីបេឡារូសក៏បានបង្ហាញឆន្ទៈក្នុងការជំរុញការផ្លាស់ប្តូរពាណិជ្ជកម្ម និងផលិតផលកសិកម្ម ព្រមទាំងស្នើឱ្យកម្ពុជាពិនិត្យលទ្ធភាពសម្រួលការធ្វើដំណើររបស់ពលរដ្ឋបេឡារូសមកកម្ពុជា តាមរយៈការពិនិត្យលទ្ធភាពលើការលើកលែងទិដ្ឋាការ។

ក្នុងឱកាសនោះលោក អ៉ីវ៉ាន ម៉ាឃែវីច ក៏បានអញ្ជើញលោក វង សូត ទៅបំពេញទស្សនកិច្ចនៅប្រទេសបេឡារូស ដើម្បីចូលរួមពិព័រណ៍ពាណិជ្ជកម្មនៅចុងខែមិថុនា ឆ្នាំ២០២៧ ខាងមុខផងដែរ៕