(កំពង់ធំ)៖ លោក សាយ គឹមឡម អភិបាលស្រុកស្ទោង រួមជាមួយសប្បុរសជន កាលពីថ្ងៃទី១២ ខែវិច្ឆិកា ឆ្នាំ២០២៦នេះ បាននាំយកគ្រឿងឧបភោគបរិភោគ និងថវិកា ទៅប្រគល់ជូនវីរកងទ័ពជួរមុខ ដែលកំពុងឈរជើងការពារបូរណភាពទឹកដី នៅទិសឧត្តរមានជ័យ។

នាឱកាសនោះ លោក សាយ គឹមឡម បានពាំនាំនូវការផ្តាំផ្ញើសួរសុខទុក្ខ ព្រមទាំងបានសម្តែងនូវការកោតសរសើរ និងដឹងគុណយ៉ាងជ្រាលជ្រៅបំផុត ចំពោះគំរូវីរភាពដ៏អង់អាចក្លាហាន និងការលះបង់ដ៏ធំធេងរបស់នាយទាហាន និងពលទាហានជួរមុខទាំងអស់ ក្នុងបុព្វហេតុជាតិសាសនានិងព្រះមហាក្សត្រនិងសុខសន្តិភាព។

លោកបានគូសបញ្ជាក់ថា ការឈរជើងយ៉ាងរឹងមាំ ដោយមិនខ្លាចនឿយហត់របស់កងកម្លាំងជួរមុខ គឺជាខែលការពារដ៏រឹងមាំក្នុងការថែរក្សាអធិបតេយ្យភាព បូរណភាពទឹកដី សន្តិសុខ និងសុខសន្តិភាពពេញលេញ ដែលផ្តល់ឱកាសឱ្យប្រជាពលរដ្ឋនៅសមរភូមិក្រោយ អាចប្រកបរបរចិញ្ចឹមជីវិត និងអភិវឌ្ឍមូលដ្ឋានឱ្យមានការរីកចម្រើន។

លោកបានបញ្ជាក់បន្ថែមថា អំណោយទាំងនេះ ថ្វីត្បិតតែមានចំនួនតិចតួចក្តី ប៉ុន្តែវាបានស្តែងចេញពីទឹកចិត្តស្រឡាញ់ ការនឹករលឹក និងការគាំទ្រយ៉ាងពេញទំហឹងពីសំណាក់អាជ្ញាធរមូលដ្ឋាន និងសប្បុរសជន ក្នុងនាមសមរភូមិក្រោយ កៀកកើយសមរភូមិមុខគ្រប់កាលៈទេសៈ និងមិនទុកឱ្យសមរភូមិមុខឯកាឡើយ។

ជាមួយស្មារតី និងមនោសញ្ចេតនាជ្រាលជ្រៅរវាងសមរភូមិក្រោយ ជាមួយសមរភូមិមុខ ក្នុងការបំពេញបេសកកម្មការពារដ៏ថ្លៃថ្លានេះ មានការចូលរួម ឧបត្ថម្ភគាំទ្រទាំងសម្ភារ ថវិកាគ្រឿងឧបភោគបរិភោគស្បៀង របស់លោក ខៀវ ប៉ាង នាយកទីចាត់ការផែនការ និងវិនិយោគខេត្តកំពង់ធំ និងលោក ហ៊ាង លីហាក់ ផងដែរ ក្រោមបរិយាកាសស្និទ្ធស្នាល និងកក់ក្តៅបំផុត ដោយមានការអញ្ជើញទទួលដោយផ្ទាល់ពីសំណាក់ លោកវរសេនីយ៍ឯក សុ វិនឆេន ប្រធានក្រុមកងរថក្រោះប្រចាំទិសទី៣ និងលោកវរសេនីយ៍ត្រី សឿង ធឿន មេបញ្ជាការរងកងវរសេនាតូចថ្មើរជើងលេខ ៤២២ ព្រមទាំងនាយទាហាន ពលទាហានជាច្រើនរូបទៀត។

ជាមួយគ្នានេះមលោកវរសេនីយ៍ឯក សុ វិនឆេន និងលោកវរសេនីយ៍ត្រី សឿង ធឿន តំណាងឱ្យនាយទាហាន និងពលទាហានទាំងអស់ បានថ្លែងអំណរគុណយ៉ាងជ្រាលជ្រៅចំពោះទឹកចិត្តសប្បុរសធម៌ និងការយកចិត្តទុកដាក់របស់លោកអភិបាលស្រុកស្ទោង លោកប្រធានទីចាត់ការផែនការ និងវិនិយោគខេត្ត ព្រមទាំងសហការី ដែលតែងតែផ្សារភ្ជាប់សុខទុក្ខ និងផ្តល់ការឧបត្ថម្ភគាំទ្រដល់កងកម្លាំងជួរមុខជាបន្តបន្ទាប់។ តំណាងនាយទាហានជួរមុខ ក៏បានប្តេជ្ញាចិត្តយ៉ាងមុតមាំក្នុងការបន្តលើកកម្ពស់ស្មារតីប្រុងប្រយ័ត្នខ្ពស់ គោរពវិន័យកងទ័ព និងបំពេញភារកិច្ចការពារជាតិមាតុភូមិឱ្យបានសម្រេចជោគជ័យ ដើម្បីតបស្នងទៅនឹងទំនុកចិត្តរបស់ថ្នាក់ដឹកនាំ និងប្រជាពលរដ្ឋទូទាំងប្រទេស។

អំណោយដែលបានប្រគល់រួមមាន៖ មី ចំនួន ៦០កេះ ទឹកត្រី ចំនួន ២០យួរ ទឹកស៊ីអ៊ីវ ចំនួន ២០យួរ ត្រីងៀត ចំនួន ២០គីឡូក្រាម សាច់ក្រក ចំនួន ២០គីឡូក្រាម កាហ្វេ ចំនួន ១កេះ បារី ចំនួន ២ប៊ិច៕