(កំពត)៖ នៅថ្ងៃទី១៣ ខែវិច្ឆិកា ឆ្នាំ២០២៦នេះ សមត្ថកិច្ចខេត្តកំពត បានសម្រេចបញ្ជូនសំណុំរឿងព្រមទាំងជនសង្ស័យចំនួនពីរនាក់ ទៅកាន់សាលាដំបូងខេត្តកំពត ដើម្បីចាត់ការបន្តតាមនីតិវិធីច្បាប់។ ជនសង្ស័យទាំងពីរនាក់នោះមានឈ្មោះ អូន រ៉ាវ័យ អាយុ៤៣ឆ្នាំ តួនាទីជាប្រធានតំណាងប្រតិបត្តិក្រុងបូកគោ នៃគណបក្សកម្លាំងជាតិ និងលោក ឆាយ ជំនោ អាយុ៤៧ឆ្នាំ ជាសមាជិកគណៈកម្មាធិការនាយកគណបក្សកម្លាំងជាតិ និងជាសមាជិកក្រុមការងារគណបក្សខេត្តកំព​ត។

ជនសង្ស័យទាំងពីរត្រូវបានចាប់ខ្លួនពីបទផ្ដើមគំនិតប្រើប្រាស់ឯកសារសាធារណៈក្លែង, ប្រើប្រាស់ឯកសារសាធារណៈក្លែង និងក្លែងបន្លំឯកសារសាធារណៈ (ស្នាមហត្ថលេខា)។ បទល្មើសទាំងនេះត្រូវបានប្រព្រឹត្តឡើងនៅភូមិព្រែកអំពិល សង្កាត់កោះតូច ក្រុងបូកគោ ខេត្តកំពត ចាប់តាំងពីថ្ងៃទី១២ ខែតុលា ឆ្នាំ២០២៦ រហូតមកដល់បច្ចុប្បន្ន។

ការបញ្ជូនសំណុំរឿងនេះធ្វើឡើងបន្ទាប់ពីមានពាក្យបណ្ដឹងរបស់ឈ្មោះ សុខ ស៊ាង ដែលបានដាក់ពាក្យបណ្ដឹងកាលពីថ្ងៃទី៥ ខែវិច្ឆិកា ឆ្នាំ២០២៦ ក្រោយពីមានក្លែងបន្លំយកឈ្មោះរបស់គាត់ទៅចុះឈ្មោះជាភ្នាក់ងារអ្នកសង្កេតការណ៏របស់គណបក្សកម្លាំងជាតិ។ នេះជាលទ្ធផលនៃការស៊ើបអង្កេតយ៉ាងយកចិត្តទុកដាក់របស់សមត្ថកិច្ច លើបទល្មើសជាក់ស្ដែងខាងលើដើម្បីធានាបាននូវយុត្តិធម៌ និងរក្សាបាននូវសណ្ដាប់ធ្នាប់សាធារណៈ៕