(ភ្នំពេញ)៖ ក្នុងនាមប្រទេសសង្កេតការ គណៈប្រតិភូថៃ ដឹកនាំដោយលោក Thanachai Wachiraworakam អគ្គទីប្រឹក្សានៃស្ថានទូតព្រះរាជាណាចក្រថៃ ប្រចាំទីក្រុង Dili ប្រទេសទីម័រឡេស្តេ បានមកដល់អាកាសយានដ្ឋានអន្តរជាតិតេជោ នារសៀលថ្ងៃទី១៣ ខែវិច្ឆិកា ឆ្នាំ២០២៦ ដើម្បីចូលរួមកិច្ចប្រជុំកំពូលហ្វ្រង់កូហ្វូនី លើកទី២០ ដែលនឹងប្រព្រឹត្តទៅចាប់ពីថ្ងៃទី១៤ ដល់ថ្ងៃទី១៦ ខែវិច្ឆិកា នៅរាជធានីភ្នំពេញ។

ប្រទេសថៃ ដែលជាសមាជិកសង្កេតការណ៍ នៃអង្គការអន្តរជាតិហ្វ្រង់កូហ្វូនី (OIF) ចាប់តាំងពីឆ្នាំ២០០៨ មក បានប្រកាសអំពីការបញ្ជូនក្រុមអ្នកសង្កេតការណ៍ទៅចូលរួមក្នុងកិច្ចប្រជុំកំពូលនេះ ទោះបីជាប្រទេសទាំងពីរមានជម្លោះព្រំដែនជាមួយគ្នាយ៉ាងណាក្តី។

ទោះជាយ៉ាងនេះក្តី រដ្ឋមន្ត្រីការបរទេសថៃ លោក ស៊ីហាសាក់ ភួងកេតកែវ (Sihasak Phuangketkeow) នាថ្មីៗនេះ បានសម្តែងការព្រួយបារម្ភ ដោយខ្លាចកម្ពុជា លើកយកជម្លោះជាមួយប្រទេសថៃ មកនិយាយនៅក្នុងកិច្ចប្រជុំកំពូលហ្វ្រង់កូហ្វូនី (Francophonie Summit)។

កិច្ចប្រជុំកំពូលហ្វ្រង់កូហ្វូនី លើកទី២០ និងកិច្ចប្រជុំពាក់ព័ន្ធ នឹងធ្វើឡើងនៅរាជធានីភ្នំពេញ នាថ្ងៃទី១៤ ដល់១៦ ខែវិច្ឆិកា ឆ្នាំ២០២៦នេះ ក្រោមប្រធានបទ៖ «រួមគ្នាបន្តកសាងសន្តិភាព ដើម្បីវិបុលភាពរួម និងស្ថិរភាពយូរអង្វែង»។ កិច្ចប្រជុំនេះ នឹងមានការចូលរួមដោយ ប្រមុខរដ្ឋ ប្រមុខរដ្ឋាភិបាល និងតំណាងប្រទេសប្រមាណជាង៧០ នៅជុំវិញពិភពលោក។ នេះបើតាមការអះអាងរបស់ លោកឧបនាយករដ្ឋមន្រ្តី ប្រាក់ សុខុន។

ក្រសួងការបរទេស និងសហប្រតិបត្តិការអន្តរជាតិកម្ពុជា បានឱ្យដឹងថា កិច្ចប្រជុំកំពូលហ្វ្រង់កូហ្វូនីលើកទី២០ នឹងអនុម័តឯកសារលទ្ធផលសំខាន់ៗចំនួន៣ ដែលឆ្លុះបញ្ចាំងពីការប្តេជ្ញាចិត្ត និងអាទិភាពរួមរបស់សហគមន៍ហ្វ្រង់កូហ្វូនី ក្នុងនោះរួមមាន៖

ទី១៖ សេចក្តីថ្លែងការណ៍ទីក្រុងភ្នំពេញ ដែលលើកពីការប្ដេជ្ញាចិត្តផ្នែកនយោបាយ ក្នុងការលើកកម្ពស់គោលការណ៍របស់ហ្វ្រង់កូហ្វូនី ស្ដីពីសន្តិសហវិជ្ជមាន កិច្ចសហប្រតិបត្តិការផ្នែកសង្គមវប្បធម៌ និងសេដ្ឋកិច្ច ព្រមទាំងការអភិវឌ្ឍសហគមន៍ហ្វ្រង់កូហ្វូនី

ទី២៖ សេចក្តីសម្រេចស្តីពីស្ថានភាព វិបត្តិ​ ការស្តារឡើងវិញក្រោយវិបត្តិ និងការកសាងសន្តិភាព នៅក្នុងតំបន់ហ្វ្រង់កូហ្វូនី

និងទី៣៖ សេចក្តីអំពាវនាវទីក្រុងភ្នំពេញ ស្តីពីការការពារបេតិកភណ្ឌវប្បធម៌ និងការលើកកម្ពស់ភាពចម្រុះនៃវប្បធម៌៕