(ភ្នំពេញ)៖ នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានជួបពិភាក្សាជាមួយលោកវរសេនីយ៍ឯក អឺសហ្គូ ប៊ូលេនអូស (Ozgur Bulent Us) នាយការិយាល័យអនុព័ន្ធយោធាតួកគីយ៉េ ប្រចាំព្រះរាជាណាចក្រកម្ពុជា ដែលមាននិវេសនដ្ឋាននៅប្រទេសវៀតណាម ក្នុងគោលបំណងពង្រឹង និងពង្រីកទំនាក់ទំនងមិត្តភាព ព្រមទាំងកិច្ចសហប្រតិបត្តិការការពារជាតិរវាងប្រទេសទាំងពីរ។

ជំនួបនេះបានធ្វើឡើងនាព្រឹកថ្ងៃទី១២ ខែវិច្ឆិកា ឆ្នាំ២០២៦នេះដែរ នៅទីស្តីការក្រសួងការពារជាតិ។

ក្នុងជំនួបនេះ នាយឧត្តមសេនីយ៍ ទៀ សីហា បានសម្តែងការអបអរសាទរចំពោះលោកវរសេនីយ៍ឯក ដែលត្រូវបានតែងតាំងជាអនុព័ន្ធយោធាតួកគីយ៉េ ប្រចាំកម្ពុជា និងបានបង្ហាញជំនឿថា តាមរយៈតួនាទីថ្មីនេះ លោកនឹងចូលរួមជំរុញ និងលើកកម្ពស់កិច្ចសហប្រតិបត្តិការការពារជាតិរវាងប្រទេសទាំងពីរឱ្យកាន់តែរីកចម្រើន។

ជាមួយគ្នានេះ នាយឧត្តមសេនីយ៍ ទៀ សីហា បានថ្លែងអំណរគុណចំពោះរដ្ឋាភិបាល និងប្រទេសតួកគី ដែលបានផ្តល់ការគាំទ្រដល់កម្ពុជាកន្លងមក ព្រមទាំងការផ្តល់បដិសណ្ឋារកិច្ចយ៉ាងកក់ក្តៅក្នុងដំណើរទស្សនកិច្ចរបស់ថ្នាក់ដឹកនាំកម្ពុជាទៅកាន់សាធារណរដ្ឋតួកគី និងការចុះហត្ថលេខាលើអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការការពារជាតិ។

នាយឧត្តមសេនីយ៍ ទៀ សីហា បានលើកឡើងថា នៅឆ្នាំ២០២៨ ខាងមុខ ប្រទេសទាំងពីរនឹងឈានដល់ខួបនៃការចាប់ផ្តើមកិច្ចសហប្រតិបត្តិការការពារជាតិ ដែលបានផ្តួចផ្តើមឡើងដោយសម្តេចពិជ័យសេនា ទៀ បាញ់ អតីតរដ្ឋមន្ត្រីក្រសួងការពារជាតិកម្ពុជា។ ទោះបីជាសកម្មភាព មួយចំនួនត្រូវបានផ្អាកដោយសារការរីករាលដាលនៃជំងឺកូវីដ-១៩ ក៏ដោយ បច្ចុប្បន្នភាគីទាំងពីរកំពុងបន្តជំរុញ និងស្តារកិច្ចសហប្រតិបត្តិការនេះឡើងវិញ។

ជាការឆ្លើយតប លោកវរសេនីយ៍ឯក អនុព័ន្ធយោធាតួកគីយ៉េ បានថ្លែងអំណរគុណចំពោះការស្វាគមន៍ និងការទទួលបដិសណ្ឋារកិច្ចយ៉ាងកក់ក្តៅពីសំណាក់កម្ពុជា ព្រមទាំងបង្ហាញការប្តេជ្ញាចិត្តក្នុងការបន្តពង្រឹងទំនាក់ទំនង និងកិច្ចសហប្រតិបត្តិការជាមួយកងយោធពលខេមរភូមិន្ទ ដោយផ្អែកលើក្របខ័ណ្ឌកិច្ចសហប្រតិបត្តិការដែលប្រទេសទាំងពីរបានចុះហត្ថលេខាកាលពីថ្ងៃទី១៦ ខែមិថុនា ឆ្នាំ២០០៦។

លោកវរសេនីយ៍ឯក ក៏បានពាំនាំនូវការផ្តាំផ្ញើសាកសួរសុខទុក្ខពីសំណាក់រដ្ឋមន្ត្រីក្រសួងការពារជាតិ និងអគ្គសេនាធិការកងទ័ពតួកគីយ៉េ និងបានសម្តែងការចូលរួម អបអរសាទរចំពោះទិវាខួបលើកទី៧៣ របស់កងយោធពលខេមរភូមិន្ទ ដែលបានដើរតួនាទីយ៉ាងសំខាន់ ចំពោះប្រជាជាតិកម្ពុជាទាំងមូល។

លោកបានបញ្ជាក់ថា ក្នុងអំឡុងពេលបំពេញបេសកកម្មនៅកម្ពុជា លោកនឹងខិតខំប្រឹងប្រែងជំរុញការអនុវត្តសកម្មភាពសហប្រតិបត្តិការដែលមានស្រាប់ និងស្វែងរកលទ្ធភាពពង្រីកកិច្ចសហប្រតិបត្តិការថ្មីៗ ដើម្បីពង្រឹងចំណងមិត្តភាព និងភាពជាដៃគូរវាងកងកម្លាំងប្រដាប់អាវុធនៃប្រទេសទាំងពីរឱ្យកាន់តែរឹងមាំ និងយូរអង្វែង៕