(ភ្នំពេញ)៖ លោកសាស្ត្រាចារ្យបណ្ឌិត ទ្រី ចាន់ធុច អនុរដ្ឋលេខាធិការ ក្រសួងផែនការ បានគូសបញ្ជាក់ពីសារប្រយោជន៍ដ៏ធំធេងនៃការប្រើប្រាស់បញ្ញាសិប្បនិម្មិត (AI) ក្នុងការជួយសម្រួលដល់ការសិក្សាស្រាវជ្រាវ និងការអនុវត្តការងារប្រចាំថ្ងៃ ដែលរួមចំណែកបង្កើនល្បឿន គុណភាព និងផលិតភាពការងារប្រកបដោយប្រសិទ្ធភាព។

ទោះជាយ៉ាងណាក៏ដោយ លោកបានសង្កត់ធ្ងន់ថា ការប្រើប្រាស់ AI ប្រកបដោយប្រសិទ្ធភាព តែតម្រូវឲ្យមានចំណេះដឹង ការត្រិះរិះពិចារណា និងការផ្ទៀងផ្ទាត់ភាពត្រឹមត្រូវជាមុនសិន។

ការជំរុញបែបនេះបានធ្វើឡើងក្នុងពិធីបើកជាផ្លូវការកម្មវិធីសិក្សាថ្មី ថ្នាក់បរិញ្ញាបត្របញ្ញាសិប្បនិម្មិត និងការអនុវត្តប្រព័ន្ធផ្សព្វផ្សាយឌីជីថល (AI Creative Production & Digital Media Applications) នៅសាកលវិទ្យាល័យអាស៊ី អឺរ៉ុប (AEU) នៅព្រឹកថ្ងៃទី១៣ ខែវិច្ឆិកា ឆ្នាំ២០២៦នេះ ដោយមានការចូលរួមពីសំណាក់អ្នកឧកញ៉ាបណ្ឌិត លី ឃុនថៃ ប្រធានក្រុមប្រឹក្សាសាកលវិទ្យាល័យអាស៊ី អឺរ៉ុប។

លោកសាស្ត្រាចារ្យបណ្ឌិត ទ្រី ចាន់ធុច បានបញ្ជាក់ថា យើងយល់យ៉ាងច្បាស់ថាយុវជនជាច្រើនបានខិតខំប្រឹងប្រែង ប៉ុន្តែដោយសារកត្តាផ្សេងៗ ឬលទ្ធផលសិក្សាកន្លងមកជាហេតុនាំឲ្យការសិក្សាមិនបានបន្ត។ ប៉ុន្តែកម្មវិធីបណ្ដុះបណ្ដាលនេះកម្រិតវប្បធម៌មិនមែនជារបាំង ឬឧបសគ្គឡើយ យុវជនដែលមានអាយុចាប់ពី១៦ឆ្នាំឡើងទៅ អាចចុះឈ្មោះចូលរៀនបានដោយមិនកំណត់អាយុអតិបរមាទេ។ ការទទួលឲ្យចូលរៀន គឺផ្អែកលើការវាយតម្លៃសមត្ថភាពភាសា និងបំណិនកុំព្យូទ័រមូលដ្ឋាន ដោយមានកម្មវិធីត្រៀមលក្ខណៈបំប៉នគ្រឹះ (Foundation Programme) រយៈពេលមួយខែផងដែរ។

លោកសាស្ត្រាចារ្យបណ្ឌិត ទ្រី ចាន់ធុច បានបន្ថែមថា ខ្លឹមសារសិក្សាមានចាប់ពីមូលដ្ឋានគ្រឹះ AI និងការសរសេរ Prompt, ការប្រើប្រាស់ AI ជំនួយការងារការិយាល័យនិងCodex, រហូតដល់ Sticker និង Animation, ការសរសេរ Script និង IP, Digital Flyer និងវីដេអូខ្លី, AI Audio និងតន្ត្រី, រហូតដល់ Poster និង Graphic Design។ ដូច្នេះប្អូនៗអាចចាប់ផ្ដើមអាជីពការងារចាប់ពីកម្រិតជំនួយការដូចជា៖ ជំនួយការបង្កើតមាតិកា AI, ជំនួយការផលិត Digital Content, ជំនួយការប្រតិបត្តិការ Social Media, អ្នករចនា Graphic កម្រិតដំបូង (Junior Graphic Designer), ជំនួយការកាត់តវីដេអូខ្លី, ជំនួយការផលិត Audio និង Podcast នៅតាមក្រុមការងារ Brand និង Marketing, ភ្នាក់ងារឌីជីថល (Digital Agencies), ក្រុមការងារ E-commerce និង Livestream, វិស័យទេសចរណ៍ និងបដិសណ្ឋារកិច្ច, ស្ថាប័នអប់រំ និងការរៀបចំព្រឹត្តិការណ៍។

អ្នកឧកញ៉ាបណ្ឌិត លី ឃុនថៃ បានថ្លែងថា កម្មវិធីនេះមិនត្រឹមតែជាវេទិកាសម្រាប់ផ្សព្វផ្សាយកិច្ចសហប្រតិបត្តិការរវាងគ្រឹះស្ថានអប់រំ និងវិស័យឯកជនប៉ុណ្ណោះទេ ប៉ុន្តែថែមទាំងជាឱកាសដ៏សំខាន់ក្នុងការតភ្ជាប់ការអប់រំទៅនឹងតម្រូវការទីផ្សារការងារ និងជំរុញការបណ្ដុះបណ្ដាលជំនាញថ្មីៗឲ្យស្របតាមការរីកចម្រើននៃបច្ចេកវិទ្យា។ ក្នុងបរិបទនៃការរីកចម្រើនផ្នែកសេដ្ឋកិច្ច និងបច្ចេកវិទ្យានាពេលបច្ចុប្បន្ន ធនធានមនុស្សដែលមានចំណេះដឹង ជំនាញវិជ្ជាជីវៈ និងសមត្ថភាពអនុវត្តការងារជាក់ស្ដែង គឺជាកត្តាដ៏សំខាន់សម្រាប់ការអភិវឌ្ឍសហគ្រាស និងសង្គមជាតិ។

អ្នកឧកញ៉ាបណ្ឌិត លី ឃុនថៃ បានបន្តថា តាមរយៈកិច្ចសហប្រតិបត្តិការនេះ សាកលវិទ្យាល័យអាចសហការជាមួយសហគ្រាសក្នុងការរៀបចំកម្មវិធីសិក្សា ការបណ្ដុះបណ្ដាលជំនាញ ការចុះកម្មសិក្សា និងការបង្កើតឱកាសការងារសម្រាប់និស្សិត ដើម្បីឲ្យនិស្សិតមានសមត្ថភាពឆ្លើយតបនឹងតម្រូវការទីផ្សារការងារបានកាន់តែប្រសើរ។ សាកលវិទ្យាល័យអាស៊ី អឺរ៉ុប មានសក្ដានុពលក្នុងការបណ្ដុះបណ្ដាលធនធានមនុស្សនៅកម្រិតផ្សេងៗ ដោយមានមហាវិទ្យាល័យថ្នាក់បរិញ្ញាបត្រចំនួន៥ គ្របដណ្ដប់លើ ២១ជំនាញ កម្មវិធីថ្នាក់បរិញ្ញាបត្រជាន់ខ្ពស់ចំនួន១៨ ជំនាញ និងថ្នាក់បណ្ឌិតចំនួន ៨ជំនាញ។

អ្នកឧកញ៉ាបណ្ឌិត លី ឃុនថៃ បានឲ្យដឹងថា វគ្គសិក្សាមានរយៈពេល ៤ខែ សរុប ១៦សប្ដាហ៍ ចែកជា ៣ ឆមាស និងមាន ៣០ ក្រេឌីត។ កម្មវិធីសិក្សារួមមានចំណេះដឹងមូលដ្ឋានអំពី AI ការប្រើប្រាស់ Prompt ការងារការិយាល័យដោយប្រើ AI ការបង្កើតរូបភាព ចលនា ស្គ្រីប វីដេអូខ្លី សំឡេង តន្ត្រី ផ្ទាំងផ្សព្វផ្សាយ និងការរចនាក្រាហ្វិក។ គោលការណ៍សំខាន់បំផុតគឺ «មនុស្សជាអ្នកដឹកនាំ AI ជាអ្នកសហការ»។ AI គឺជាឧបករណ៍ជំនួយក្នុងការបង្កើតគំនិត និងបង្កើនប្រសិទ្ធភាពការងារ ប៉ុន្តែមនុស្សនៅតែជាអ្នកសម្រេចចិត្ត និងទទួលខុសត្រូវលើលទ្ធផលចុងក្រោយ។ ជាពិសេសការប្រើប្រាស់ AI ត្រូវគោរពភាពត្រឹមត្រូវនៃព័ត៌មាន ការការពារឯកជនភាព សិទ្ធិអ្នកនិពន្ធ និងការអនុញ្ញាតប្រើប្រាស់រូបភាពសំឡេង ព្រមទាំងប្រភពនៃសម្ភារៈដែលយកមកប្រើប្រាស់៕