(ភ្នំពេញ)៖ ការធ្វើជាម្ចាស់ផ្ទះរបស់កម្ពុជា ក្នុងកិច្ចប្រជុំកំពូលហ្វ្រង់កូហ្វូនីលើកទី២០ បានចាប់ផ្ដើមចេញដំណើរហើយជាមួយសន្និសីទថ្នាក់រដ្ឋមន្ដ្រីការបរទេសហ្វ្រង់កូហ្វូនី លើកទី៤៨ (48e CMF) នៅព្រឹកថ្ងៃទី១៤ ខែវិច្ឆិកា ឆ្នាំ២០២៦នេះ ពោលមុនកិច្ចប្រជុំកំពូលហ្វ្រង់កូហ្វូនីមួយថ្ងៃ ដែលនឹងចាប់ផ្ដើមនៅថ្ងៃទី១៥ ខែវិច្ឆិកាស្អែក។

កិច្ចប្រជុំនេះ ដឹកនាំដោយឧបនាយករដ្ឋមន្ដ្រី ប្រាក់ សុខុន រដ្ឋមន្ដ្រីក្រសួងការបរទេស និងសហប្រតិបត្តិការអន្ដរជាតិ និងជាប្រធានសន្និសីទថ្នាក់រដ្ឋមន្ដ្រីការបរទេសហ្វ្រង់កូហ្វូនី លើកទី២៨ (48e CMF) និងមានការចូលរួមពីរដ្ឋមន្ដ្រីការបរទេសបណ្ដាប្រទេសសមាជិកជាច្រើនទៀត។ សន្និសីទនេះធ្វើឡើងនៅសណ្ឋាគារសុខាភ្នំពេញ។

សន្និសីទថ្នាក់រដ្ឋមន្ដ្រីការបរទេសហ្វ្រង់កូហ្វូនី លើកទី៤៨ មិនត្រឹមតែជាកិច្ចប្រជុំត្រៀមសម្រាប់កិច្ចប្រជុំកំពូលហ្វ្រង់កូហ្វូនីប៉ុណ្ណោះទេ ប៉ុន្ដែជាយន្ដការនយោបាយដ៏សំខាន់ សម្រាប់ការតាមដានការសម្រេចកិច្ចប្រជុំកំពូលមុន, រៀបចំទិសដៅ និងឯកសារសំខាន់ៗសម្រាប់កិច្ចប្រជុំកំពូលបន្ទាប់, អនុម័តថវិកា និងរបាយការណ៍ហរិញ្ញវត្ថុរបស់អង្គការហ្វ្រង់កូហ្វូនី, ពិភាក្សាអនុម័តលើបញ្ហាអន្ដរជាតិដែលពាក់ព័ន្ធ។ ចំណុចនេះទាំងអស់នេះ គឺស្របទៅតាមតួនាទីផ្លូវការ នៃកិច្ចប្រជុំកំពូលថ្នាក់រដ្ឋមន្ដ្រីដែលហៅថា CMF។

សន្និសីទថ្នាក់រដ្ឋមន្ដ្រីហ្វ្រង់កូហ្វូនី គឺជាវេទិកាដ៏មានសារៈសំខាន់សម្រាប់ពង្រឹងកិច្ចសហប្រតិបត្តិការអន្ដរជាតិ រក្សាផលប្រយោជន៍រួមរបស់ប្រទេសសមាជិក និងជំរុញការអភិវឌ្ឍប្រកបដោយចីរភាព។ សម្រាប់កម្ពុជា ការធ្វើជាម្ចាស់ផ្ទះកិច្ចប្រជុំនេះ និងកិច្ចប្រជុំកំពូលហ្វ្រង់កូហ្វូនី គឺជាឱកាសនៃការលើកកម្ពស់កិត្យានុភាពជាតិ ពង្រឹងទំនាក់ទំនងការទូត និងបើកទូលាយឱកាសអភិវឌ្ឍន៍ជាមួយសមាគមអន្ដរជាតិ។

សូមជម្រាបថា កម្ពុជានឹងធ្វើជាម្ចាស់ផ្ទះ កិច្ចប្រជុំកំពូលហ្វ្រង់កូហ្វូនីលើកទី២០ (Sommet de la Francophonie) ចាប់ពីថ្ងៃទី១៥-១៦ ខែវិច្ឆិកា ឆ្នាំ២០២៦ ក្រោមមូលបថ «រួមគ្នាបន្តកសាងសន្តិភាព ដើម្បីវិបុលភាពរួម និងស្ថិរភាពយូរអង្វែង»។

នេះជាលើកដំបូងដែលកម្ពុជាធ្វើជាម្ចាស់ផ្ទះ ក្នុងការរៀបចំកិច្ចប្រជុំកំពូលហ្វ្រង់កូហ្វូនី ហើយក៏ជាលើកដំបូងផងដែរ, ចាប់តាំងពីកិច្ចប្រជុំកំពូលនៅទីក្រុងហាណូយ កាលពីឆ្នាំ១៩៩៧ ដែលកិច្ចប្រជុំកំពូលនេះបានវិលត្រឡប់មកកាន់ តំបន់អាស៊ីអាគ្នេយ៍សាជាថ្មីម្តងទៀត។ សម្រាប់ប្រទេសកម្ពុជា កិច្ចប្រជុំកំពូលនាពេលនេះ គឺជាខណៈពេលដ៏មានមោទនភាព, ជាខណៈពេលនៃសាមគ្គីភាព និងជាខណៈពេលនៃការអបអរដ៏រីករាយសម្រាប់យើងទាំងអស់គ្នា៕