(ភ្នំពេញ)៖ ព្រះចៅអធិការវត្តមណិរតនារាម ហៅវត្តទួលទំពូង ព្រះមន្ត្រីសង្ឃ អាចារ្យ គណៈកម្មការវត្ត និងពុទ្ធបរិស័ទចំណុះជើងវត្ត បានបង្ហាញក្តីព្រួយបារម្ភយ៉ាងខ្លាំងចំពោះស្ថានភាពព្រះវិហាររបស់ខ្លួន ដែលកំពុងរងនូវភាពទ្រុឌទ្រោមយ៉ាងធ្ងន់ធ្ងរ រហូតមិនអាចប្រើប្រាស់បាន និងបង្កជាហានិភ័យខ្ពស់ដល់អាយុជីវិតមនុស្សដោយយថាហេតុ។

បច្ចុប្បន្ន ព្រះសង្ឃមិនអាចធ្វើសង្ឃកម្មតាមពុទ្ធប្បញ្ញត្តិ និងពុទ្ធានុញ្ញាតបានឡើយ ដោយសារព្រះវិហារនេះមានសភាពចាស់ទ្រុឌទ្រោមខ្លាំង និងមានការបាក់ស្រុតដែលអាចបង្កគ្រោះថ្នាក់ដល់អាយុជីវិតគ្រប់ពេល។

យោងតាមការបញ្ជាក់ពីព្រះចៅអធិការវត្ត ព្រះវិហារនេះត្រូវបានធ្វើការជួសជុលធំៗចំនួនពីរលើករួចមកហើយ ប៉ុន្តែនៅតែមិនអាចប្រើប្រាស់បានដដែល ដោយសារសំណង់មានលក្ខណៈខុសបទដ្ឋានបច្ចេកទេសមួយចំនួន និងមានការបាក់ធ្លាក់ជាបន្តបន្ទាប់។ សសរព្រះវិហាររងសម្ពាធទម្ងន់ធ្ងន់ ធ្វើឱ្យប្រេះតួសសរចេញដែកយ៉ាងច្បាស់ រីឯពិដានខាងលើជ្រាបទឹក ពុកផុយ និងបាក់ធ្លាក់ដោយអន្លើ។

ចំពោះប្លង់សេជាន់ខាងក្រោមមានកន្លែងខ្លះប្រេះ និងកន្លែងខ្លះបាក់ធ្លាក់គួរឱ្យព្រួយបារម្ភក្រៃលែង។ នៅពេលព្រះសង្ឃឡើងមកទីនេះ គឺមានអារម្មណ៍ញ័ររញ្ជួយ រហូតមកទល់ពេលនេះ ព្រះសង្ឃលែងហ៊ានឡើងធ្វើពិធីកម្ម ឬសង្ឃកម្មនៅលើព្រះវិហារនេះទៀតហើយ។

ដោយសារព្រះវិហារមានស្ថានភាពទ្រុឌទ្រោមខ្លាំងមិនអាចជួសជុលបានតទៅទៀត ព្រះចៅអធិការ ព្រះមន្ត្រីសង្ឃ អាចារ្យ គណៈកម្មការវត្ត និងពុទ្ធបរិស័ទ បានក្រាបបង្គំទូលថ្វាយ និងស្នើសុំកិច្ចអន្តរាគមន៍ពីស្ថាប័នពាក់ព័ន្ធ រួមមាន គណៈសង្ឃនាយក គណៈមហានិកាយនៃព្រះរាជាណាចក្រកម្ពុជា សម្តេចព្រះមេគណរាជធានីភ្នំពេញ ព្រមទាំងសូមចម្រើនពរបិណ្ឌបាតដល់ក្រសួងធម្មការ និងសាសនា និងក្រសួងស្ថាប័នពាក់ព័ន្ធ។

ព្រមជាមួយគ្នានេះ ព្រះចៅអធិការវត្តក៏បានអំពាវនាវដល់ប្រជាពុទ្ធបរិស័ទ និងសាធារណសប្បុរសជនប្រុសស្រីទាំងអស់ មេត្តាជួយគិតគូរ និងដោះស្រាយបញ្ហាខាងលើនេះដោយព្រះទ័យ និងចិត្តអនុគ្រោះ។

ការចូលរួមចែករំលែក និងការផ្តល់យោបល់ពីគ្រប់ព្រះអង្គ ព្រមទាំងលោកអ្នកសាធារណសប្បុរសជនទាំងអស់ ជុំវិញភាពទ្រុឌទ្រោមដ៏ធ្ងន់ធ្ងរនៃព្រះវិហារនេះ គឺជាសារដ៏មានសារៈសំខាន់បំផុតនាពេលបច្ចុប្បន្ន ដើម្បីស្វែងរកកម្លាំងសាមគ្គីក្នុងការជួយជ្រោមជ្រែងដល់ទីអារាមមួយនេះ៕