សម្តេចមហាបវរធិបតី ហ៊ុន ម៉ាណែត អញ្ជើញបើកផ្លូវការព្រឹត្តិការណ៍ហ្វ្រង់កូតិច២០២៦ (Video inside)
15-11-2026 15:26
(ភ្នំពេញ)៖ នៅរសៀលថ្ងៃអាទិត្យ ៦កើត ខែកក្តិក ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១៥ ខែវិច្ឆិកា ឆ្នាំ២០២៦នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា អញ្ជើញជាអធិបតីបើកព្រឹត្តិការណ៍ហ្វ្រង់កូតិច២០២៦ (FrancoTech
2026) ដែលរៀបចំឡើងនៅមជ្ឈមណ្ឌលសន្និបាត និងពិព័រណ៍អន្តរជាតិកោះពេជ្រ។
ក្នុងពិធីបើកផ្លូវការនារសៀលថ្ងៃនេះ ក៏មានការអញ្ជើញចូលរួមពីប្រមុខរដ្ឋ ប្រមុខរដ្ឋាភិបាលប្រទេសមួយចំនួន ដែលអញ្ជើញចូលរួមក្នុងកិច្ចប្រជុំកំពូលហ្វ្រង់កូហ្វូនី ព្រមទាំងមន្ត្រីជាន់ខ្ពស់រាជរដ្ឋាភិបាលកម្ពុជា និងបណ្តាថ្នាក់ដឹកនាំក្រុមហ៊ុនផ្នែកបច្ចេកវិទ្យាទាំងនៅកម្ពុជា និងបណ្តាប្រទេសសមាជិកអង្គការហ្វ្រង់កូហ្វូនី។
ព្រឹត្តិការណ៍ហ្វ្រង់កូតិច ២០២៦ (FrancoTech 2026) គឺជាព្រឹត្តិការណ៍អមដ៏សំខាន់នៃកិច្ចប្រជុំកំពូលហ្វ្រង់កូហ្វូនីលើកទី២០ ដែលព្រះរាជាណាចក្រកម្ពុជាធ្វើជាម្ចាស់ផ្ទះ ព្រឹត្តិការណ៍នេះប្រព្រឹត្តទៅចាប់ពីថ្ងៃទី១៤ ដល់ថ្ងៃទី១៦ ខែវិច្ឆិកា ឆ្នាំ២០២៦ នៅមជ្ឈមណ្ឌលសន្និបាត និងពិព័រណ៍កោះពេជ្រ អគារ A-F រាជធានីភ្នំពេញ។
គោលបំណងនៃព្រឹត្តិការណ៍នេះ ដើម្បីលើកកម្ពស់កិច្ចសហប្រតិបត្តិការ និងជំរុញនវានុវត្តន៍ក្នុងវិស័យបច្ចេកវិទ្យា និងឌីជីថល ក្រោមមូលបទ «សហគមន៍ហ្វ្រង់កូហ្វូនីតែមួយ អនាគតឌីជីថលតែមួយ» ព្រឹត្តិការណ៍នេះ រៀបចំឡើងដោយក្រសួងប្រៃសណីយ៍ និងទូរគមនាគមន៍ សហការជាមួយក្រសួងកិច្ចការនារី ក្រសួងការបរទេស និងសហប្រតិបត្តិការអន្តរជាតិ ព្រមទាំងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ រួមជាមួយដៃគូពាក់ព័ន្ធ។
ព្រឹត្តិការណ៍នេះ បានប្រមូលផ្តុំដោយគណៈប្រតិភូជាន់ខ្ពស់រដ្ឋាភិបាល ថ្នាក់ដឹកនាំ អ្នកជំនាញ ក្រុមហ៊ុនបច្ចេកវិទ្យា វិនិយោគិន និងធុរកិច្ចថ្មីមកពីបណ្តាប្រទេសនិយាយភាសាបារាំង ដើម្បីចែករំលែកចំណេះដឹង បទពិសោធ បច្ចេកវិទ្យាថ្មីៗ និងឧត្តមានុវត្តន៍ ព្រមទាំងពង្រឹងកិច្ចសហប្រតិបត្តិការសេដ្ឋកិច្ច បច្ចេកវិទ្យា និងវិនិយោគ ព្រមទាំងតភ្ជាប់សហគមន៍ហ្វ្រង់កូហ្វូនីនិងអាស៊ាន។
ព្រឹត្តិការណ៍នេះមានកម្មវិធីសំខាន់ៗ ដូចជា ពិព័រណ៍បច្ចេកវិទ្យា និងនវានុវត្តន៍, ការប្រកួតប្រជែងនវានុវត្តន៍ឌីជីថល, វេទិកាវិនិយោគ, ការផ្គូផ្គងធុរកិច្ច នឹងវេទិកាពិភាក្សា។ កម្មវិធីទាំងនេះ ផ្តោតលើវេទិកាស្នូលចំនួន ៧ រួមមានដូចជា៖
វេទិកាទី១៖ កាលានុវត្តភាព និងអភិបាលកិច្ចបញ្ញាសិប្បនិម្មិត (AI)៖ មានគោលបំណងដើម្បីពិនិត្យយុទ្ធសាស្ត្រគាំទ្រ ការអភិវឌ្ឍបញ្ញាសិប្បនិម្មិត ដោយធ្វើឱ្យមានតុល្យភាពរវាងការទទួលខុសត្រូវ នវានុវត្តន៍ សមត្ថភាពប្រកួតប្រជែង និងការគ្រប់គ្រងហានិភ័យផ្នែកសីលធម៌។ កិច្ចពិភាក្សានេះនឹងផ្តោតលើអភិបាលកិច្ចបញ្ញាសិប្បនិម្មិតប្រកបដោយអធិបតេយ្យភាព ការការពារទិន្នន័យផ្ទាល់ខ្លួន ភាពលម្អៀងនៃក្បួនដោះស្រាយ (Algorithmic Bias) ព្រមទាំងការធានាឱ្យមានការចូលរួមប្រកបដោយសមធម៌នៃភាសា និងវប្បធម៌ក្នុងសហគមន៍ប្រើប្រាស់ភាសាបារាំង (Francophone) ដែលធនធាន និងការគាំទ្រនៅមានកម្រិត។
វេទិកាពិភាក្សាទី២៖ វេទិការដ្ឋមន្ត្រីស្ដីពីរដ្ឋាភិបាលឌីជីថល៖ មានគោលបំណងដើម្បីប្រមូលផ្ដុំរដ្ឋមន្ត្រី និងថ្នាក់ដឹកនាំរដ្ឋាភិបាលមកពីអាស៊ាន អឺរ៉ុប និងអាហ្វ្រិក ដើម្បីផ្លាស់ប្ដូរពីការធ្វើឱ្យការងារមានលក្ខណៈឌីជីថល ទៅជាការក្លាយជារដ្ឋាភិបាលឌីជីថល។ ផ្ដោតលើហេដ្ឋារចនាសម្ព័ន្ធសាធារណៈឌីជីថល (DPI) ដែលអាចពង្រីកបាន ភាពអាចធ្វើអន្តរប្រតិបត្តិការ អត្តសញ្ញាណឌីជីថល ការសម្របខ្លួនវេទិកាសាធារណៈឆ្លងព្រំដែន និងការប្រើប្រាស់ AI ប្រកបដោយការទទួលខុសត្រូវក្នុងវិស័យសាធារណៈ។
វេទិកាពិភាក្សាទី៣៖ បច្ចេកវិទ្យាហិរញ្ញវត្ថុ (FinTech) ដើម្បីលើកកម្ពស់បរិយាបន្នហិរញ្ញវត្ថុ៖ ពិភាក្សា ផ្តោតលើបរិវត្តកម្មប្រព័ន្ធទូទាត់ឌីជីថល ដោយយកប្រព័ន្ធទូទាត់ ប្រាក់បាគង (Bakong) របស់កម្ពុជា និងគំរូបច្ចេកវិទ្យាហិរញ្ញវត្ថុអន្តរជាតិជាមូលដ្ឋាន ក្នុងការពង្រីកសេវាហិរញ្ញវត្ថុជូនដល់ប្រជាជនដែលពុំទាន់ទទួលបានសេវាហិរញ្ញវត្ថុ គ្រប់គ្រាន់ និងសហគ្រាសមីក្រូ ធុនតូច និងមធ្យម (MSMEs) ព្រមទាំងធានានូវការ ការពារសន្តិសុខសាយប័រ អន្តរប្រតិបត្តិការ និងទំនុកចិត្តរបស់អ្នកប្រើប្រាស់។
វេទិកាពិភាក្សាទី៤៖ បច្ចេកវិទ្យាកសិកម្ម និងសន្តិសុខស្បៀង៖ កិច្ចពិភាក្សានេះផ្តោតលើទំនើបកម្មបច្ចេកវិទ្យាដែលពង្រឹងផលិតភាពនិងភាពធន់នៃ វិស័យកសិកម្ម ដែលរួមមានកសិកម្មជាក់លាក់ (precision farming), បច្ចេកវិទ្យា IOT, ជីវបច្ចេកវិទ្យា (biotechnology) បច្ចេកទេសកែច្នៃទំនើប (processing advances) និង ប្រព័ន្ធឌីជីថលសម្រាប់តាមដានប្រភពគ្រប់ពូជដែលមានតម្លៃខ្ពស់ ដើម្បីធានាថា ផលិតផលសិកម្មទាំងអស់បំពេញតាមស្តង់ដានាំចេញអន្តរជាតិ។
វេទិកាពិភាក្សាទី៥៖ ធុរកិច្ចថ្មីឌីជីថល និងនវានុវត្តន៍៖ វេទិកាពិភាក្សារវាងស្ថាបនិក មជ្ឈមណ្ឌលគាំទ្របច្ចេកវិទ្យា និងវិនិយោគិន ស្តីពីការពង្រីកវិសាលភាពរបស់សហគ្រាសធុរកិច្ចថ្មីឌីជីថលទៅកាន់ទីផ្សារអន្តរជាតិ តាមរយៈការប្រើប្រាស់ច្រកតភ្ជាប់ទីផ្សារឆ្លងដែន និងការតភ្ជាប់មជ្ឈមណ្ឌលនវានុវត្តន៍ ក្នុងតំបន់អាស៊ានទៅកាន់បណ្តាញនៃសហគមន៍ដែលប្រើប្រាស់ភាសាបារាំង។
វេទិកាពិភាក្សាទី៦៖ ភាពជាអ្នកដឹកនាំរបស់ស្ត្រីក្នុងវិស័យបញ្ញាសប្បនិម្មិត (AI) និងបច្ចេកវិទ្យាថ្មីៗ៖ វេទិកាពិភាក្សានេះមានគោលបំណងលើកកម្ពស់ភាពជាអ្នកដឹកនាំនិងការចូលរួមប្រកបដោយអត្ថន័យរបស់ស្ត្រីក្នុងវិស័យបច្ចេកវិទ្យាថ្មីៗ និងអភិបាលកិច្ចឌីជីថល។ កិច្ចពិភាក្សានេះនឹងផ្តោតលើ ភាពលំអៀងនៃក្បួនដោះស្រាយ (algorithmic bias) ការលើកកម្ពស់ជំនាញឌីជីថល សុវត្ថិភាពតាមប្រព័ន្ធអនឡាញ និងការទទួលបាន ហិរញ្ញប្បទានសម្រាប់សហគ្រិនភាពក្នុងបណ្តាប្រទេសប្រើប្រាស់ភាសាបារាំង។
វេទិកាពិភាក្សាទី៧៖ បេតិកភណ្ឌរស់ក្នុងយុគសម័យឌីជីថល (បច្ចេកវិទ្យាសម្រាប់វិស័យទេសចរណ៍ និងវប្បធម៌)៖ វេទិកាពិភាក្សានេះ ស្វែងយល់អំពីការប្រើប្រាស់ប្រព័ន្ធផ្សព្វផ្សាយបែបនិម្មិត (AR/VR/XR), ការគ្រប់គ្រងគោលដៅទេសចរណ៍ដោយប្រើប្រាស់បញ្ញាសប្បនិម្មិត (AI), ការរក្សាទុកនិងចងក្រងឯកសារបេតិកភណ្ឌតាមប្រព័ន្ធឌីជីថល ព្រមទាំង ការប្រើប្រាស់កម្មវិធីមានពហុភាសាដែលជួយលើកកម្ពស់បទពិសោធន៍របស់ភ្ញៀវ ទេសចរណ៍ និងថែរក្សាកម្មសិទ្ធិជាម្ចាស់នៃសហគមន៍មូលដ្ឋាន និងទ្រង់ទ្រាយដើម នៃបេតិកភណ្ឌ៕




