Fresh News និងក្រុមអ្នកសារព័ត៌មានកម្ពុជា ធ្វើទស្សនកិច្ចស្វែងយល់ពីសក្តានុពលមន្ទីរពេទ្យឈានមុខធំៗនៅម៉ាឡេស៊ី ខណៈកំណើនពលរដ្ឋខ្មែរ ទៅទទួលសេវាទេសចរសុខាភិបាល កើនឡើង
17-11-2026 17:49
(កូឡាឡាំពួរ, ម៉ាឡេស៊ី)៖ បណ្តាញព័ត៌មាន Fresh News និងអ្នកសារព័ត៌មានកម្ពុជាមួយចំនួនទៀត បានចាប់ផ្តើមដំណើរទស្សនកិច្ចរយៈពេល៤ថ្ងៃ នៅប្រទេសម៉ាឡេស៊ី ចាប់ពីថ្ងៃទី១៧ ដល់ថ្ងៃទី២០ ខែវិច្ឆិកា ឆ្នាំ២០២៦ ដើម្បីស្វែងយល់ដោយផ្ទាល់អំពីសក្តានុពល និងស្តង់ដារនៃវិស័យទេសចរណ៍សុខាភិបាលម៉ាឡេស៊ី ខណៈចំនួនពលរដ្ឋកម្ពុជាដែលធ្វើដំណើរទៅទទួលសេវាព្យាបាលនៅប្រទេសអាស៊ានមួយនេះ មានការកើនឡើងរហូតដល់ ៨១ភាគរយ កាលពីឆ្នាំមុន។
ក្នុងអំឡុងពេលនៃដំណើរទស្សនកិច្ចសិក្សានេះ ក្រុមអ្នកសារព័ត៌មានកម្ពុជា នឹងចុះពិនិត្យមើលបរិក្ខារបច្ចេកវិទ្យាវេជ្ជសាស្ត្រទំនើបៗ សេវាថែទាំព្យាបាល ព្រមទាំងធ្វើបទសម្ភាសន៍ជាមួយថ្នាក់ដឹកនាំ និងក្រុមគ្រូពេទ្យជំនាញនៅតាមមន្ទីរពេទ្យឈានមុខមួយចំនួនរបស់ប្រទេសម៉ាឡេស៊ី រួមមាន មន្ទីរពេទ្យ PHKL មន្ទីរពេទ្យ KLCC និងមន្ទីរពេទ្យធំៗមួយចំនួនទៀត។ ជាមួយគ្នានេះ IHH Healthcare ដែលជាបណ្ដាញមន្ទីពេទ្យល្បីៗមួយចំនួន ដូចជា មន្ទីពេទ្យ Pantai មន្ទីពេទ្យ Prince Count និងមន្ទីពេទ្យ Gleneagle ជាដើម។
ពាក់ព័ន្ធនឹងកំណើននៃការប្រើប្រាស់សេវាសុខាភិបាលនេះ លោក Suriaghandi Suppiah នាយកប្រតិបត្តិនៃក្រុមប្រឹក្សាទេសចរណ៍សុខាភិបាលម៉ាឡេស៊ី (MHTC) ធ្លាប់បានគូសបញ្ជាក់ថា កម្ពុជាគឺជាដៃគូដ៏សំខាន់មួយសម្រាប់ម៉ាឡេស៊ី ដោយយោងតាមទិន្នន័យគិតត្រឹមខែកញ្ញា ឆ្នាំមុន ចំនួនអ្នកធ្វើដំណើរដើម្បីទទួលសេវាសុខាភិបាលបានកើនឡើង ៨១ភាគរយ ពីជាង ៤,៤០០នាក់ ទៅជិត ៨,០០០នាក់ បើប្រៀបធៀបនឹងរយៈពេលដូចគ្នាកាលពីឆ្នាំ២០២៤។ ការណ៍នេះបានបង្ហាញពីការជឿជាក់យ៉ាងខ្លាំងលើគុណភាពសុខាភិបាលវេជ្ជសាស្ត្ររបស់ម៉ាឡេស៊ី។
ដំណើរទស្សនកិច្ចរបស់អ្នកសារព័ត៌មានកម្ពុជានាពេលនេះ ក៏ធ្វើឡើងស្របពេលដែលវិស័យសុខាភិបាលម៉ាឡេស៊ី កំពុងបន្តពង្រឹងកិច្ចសហប្រតិបត្តិការឆ្លងដែនជាមួយកម្ពុជា តាមរយៈភាពជាដៃគូយុទ្ធសាស្ត្រជាមួយកម្ពុជា ដើម្បីរួមចំណែកលើកកម្ពស់ និងពង្រឹងប្រព័ន្ធសុខាភិបាលនៃប្រទេសទាំងពីរឱ្យកាន់តែរឹងមាំ៕











