អាវុធហត្ថខេត្តបន្ទាយមានជ័យ បញ្ជូនជនសង្ស័យម្នាក់ទៅសាលាដំបូងខេត្ត ករណីលួចម៉ូតូ ទទួលផលចោរកម្ម និងគ្រឿងញៀន
18-11-2026 15:20
(បន្ទាយមានជ័យ)៖ នៅវេលាម៉ោង ២០៖៤០នាទី ថ្ងៃទី១៥ ខែវិច្ឆិកា ឆ្នាំ២០២៦ ជនរងគ្រោះឈ្មោះ ពេជ្រ និល ភេទប្រុស អាយុ៤៥ឆ្នាំ រស់នៅភូមិគីឡូលេខ៤ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ បាននាំខ្លួនឈ្មោះ ឈួង ម៉យ ហៅក្រៅ ង៉ោល ភេទប្រុស អាយុ៣៣ឆ្នាំ ស្នាក់នៅមិនពិតប្រាកដក្នុងក្រុងប៉ោយប៉ែត មកកាន់មូលដ្ឋានកងរាជអាវុធហត្ថក្រុងប៉ោយប៉ែត ដោយប្ដឹងចោទប្រកាន់ឈ្មោះ ឈួង ម៉យ រឿងលួចម៉ូតូ ម៉ាកហុងដា ឌ្រីម ពណ៌ខ្មៅ ផលិតឆ្នាំ២០២៥ ពាក់ផ្លាកលេខបន្ទាយមានជ័យ 1AD-6632 នៅថ្ងៃទី៨ ខែវិច្ឆិកា ឆ្នាំ២០២៦ នៅចំណុចភូមិគីឡូលេខ៤ សង្កាត់ផ្សារកណ្ដាល។
ក្រោយពីទទួលបានពាក្យបណ្ដឹងរបស់ជនរងគ្រោះខាងលើ លោកអនុសេនីយ៍ឯក តិល តៃលីវ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានចាត់ឱ្យកម្លាំងជំនាញមូលដ្ឋានធ្វើការសួរចម្លើយតាមនីតិវិធី។
ក្រោយជំនាញសាកសួរ ជនសង្ស័យឈ្មោះ ឈួង ម៉យ (ង៉ោល) បានឆ្លើយសារភាពថា ខ្លួនពិតជាបានប្រព្រឹត្តដូចការប្ដឹងចោទប្រកាន់របស់ជនរងគ្រោះពិតប្រាកដមែន ដោយខ្លួនបានធ្វើសកម្មភាពលួចម៉ូតូរបស់ជនរងគ្រោះ ហើយបានយកទៅលក់ឱ្យបក្ខពួកម្នាក់ទៀត ឈ្មោះ ពៅ ក្រហ៊ុប (ចាន់ ពៅ) ភេទប្រុស អាយុប្រហែល ៤៦ ឆ្នាំ ក្នុងតម្លៃ ៥០០.០០០ រៀល។ ខ្លួនបានយកលុយពីឈ្មោះ ពៅ ក្រហ៊ុប (ចាន់ ពៅ) តែចំនួន ១០០.០០០ រៀល (ដប់ម៉ឺនរៀល) ប៉ុណ្ណោះ ចំណែកលុយនៅសល់ ខ្លួនកាត់យកជាគ្រឿងញៀនប្រភេទម៉ាទឹកកកពីឈ្មោះ ពៅ ក្រហ៊ុប (ចាន់ ពៅ) វិញ គឺយកទៅប្រើប្រាស់និងចែកចាយបន្ត។
ដោយទទួលបានតម្រុយបទល្មើសនិងបក្ខពួក កម្លាំងជំនាញមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី គង់ រិទ្ធា មន្ត្រីនគរបាលយុត្តិធម៌ បានចុះបង្ក្រាបទីតាំងស្នាក់នៅរបស់ជនសង្ស័យឈ្មោះ ពៅ ក្រហ៊ុប (ចាន់ ពៅ) នៅវេលាម៉ោង ១០៖៣០នាទី ថ្ងៃទី១៦ ខែវិច្ឆិកា ឆ្នាំ២០២៦ នៅចំណុចម្ដុំដីស ស្ថិតក្នុងភូមិក្បាលស្ពាន១ សង្កាត់អូរជ្រៅ ស្រាប់តែជនសង្ស័យឈ្មោះ ពៅ ក្រហ៊ុប (ចាន់ ពៅ) និងបក្ខពួកម្នាក់ទៀត បានរត់គេចខ្លួន។
សមត្ថកិច្ចបានធ្វើការត្រួតពិនិត្យនៅកន្លែងស្នាក់នៅរបស់ជនសង្ស័យឈ្មោះ ពៅ ក្រហ៊ុប (ចាន់ ពៅ) រកឃើញមានបំណែកម៉ូតូ និងវត្ថុតាងដូចជា៖ ស្រោមសំបុត្រពណ៌គគីរបិទជិត ចំនួន ០១ សំបុត្រ (មានថ្នាំគ្រាប់ពណ៌ក្រហមក្បឿង (WY) ចំនួន ១៤៤ គ្រាប់កន្លះ ទម្ងន់ ១៨,៥៥ ក្រាម, ម្សៅក្រាមពណ៌សថ្លា ចំនួន ១២៨ កូនថង់កិប (០១ ថង់ធំ) ទម្ងន់ ៦១,១០ ក្រាម), ហិប ចំនួន ០៣ (ហិបដែក ០២ ហិបឈើ ០១), ជញ្ជីងថ្លឹងគ្រឿងញៀន ចំនួន ០៣ គ្រឿង, កាំបិតកែច្នៃ ចំនួន ០២ ដើម, ម៉ាស៊ីនសម្រាប់អ៊ុតមាត់ថង់ ចំនួន ០១ គ្រឿង, កូនស្លាបព្រាដែក ចំនួន ០១, កូនកាបូបពណ៌ខ្មៅ ចំនួន ០១, ផ្លាកលេខម៉ូតូ ចំនួន ០១ សន្លឹក, កង់ម៉ូតូ ចំនួន ០១ គូ, បំណែកម៉ូតូមួយចំនួន, កាតគ្រីម៉ូតូ ចំនួន ០១ សន្លឹក, ឯកសារមួយចំនួន, និងថង់សម្រាប់វិចខ្ចប់គ្រឿងញៀនមួយចំនួន។ វត្ថុតាងទាំងអស់ត្រូវបាននាំមកកាន់មូលដ្ឋានកងរាជអាវុធហត្ថក្រុង ដើម្បីចាត់ការតាមនីតិវិធី និងកសាងសំណុំរឿងបញ្ជូនមកកាន់បញ្ជាការដ្ឋានកងរាជអាវុធហត្ថខេត្តចាត់ការបន្តតាមនីតិវិធី។ ចំណែកជនសង្ស័យដែលបានរត់គេចខ្លួន សមត្ថកិច្ចកំពុងស្វែងរកចាប់ខ្លួនបន្ត។
លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវ និងបង្ក្រាបបទល្មើស បានឱ្យដឹងថា ការបង្ក្រាបករណីខាងលើនេះ ក៏ទទួលបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តផងដែរ។
បច្ចុប្បន្ន ជនសង្ស័យត្រូវបានកម្លាំងការិយាល័យព្រហ្មទណ្ឌ កងរាជអាវុធហត្ថខេត្តបញ្ជូនទៅសាលាដំបូងខេត្តហើយ នៅព្រឹកថ្ងៃពុធ ទី១៨ ខែតុលា ឆ្នាំ២០២៦ ដើម្បីអនុវត្តតាមនីតិវិធី៕








