* ព្រឹកថ្ងៃនេះ សម្តេចមហាបវរធិបតី ហ៊ុន ម៉ាណែត អញ្ជើញបើកពិព័រណ៍ផលិតផលខ្មែរលើកទី៤
* វៀតណាម លុបចោលទោសប្រហារជីវិតលើបទល្មើសជួញដូរគ្រឿងញៀន និងបទល្មើសមួយចំនួនទៀត
* វិភាគអន្តរជាតិ៖ នៅពីក្រោយផ្ទាំងទស្សនីយភាពការទូតនៃមហាយក្សទាំង៣
* មីយ៉ាន់ម៉ាចាត់ទុកសាលក្រម ICJ រឿងអំពើប្រល័យពូជសាសន៍ថា «អយុត្តិធម៌»
* ឯកអគ្គរដ្ឋទូតបារាំង៖ បារាំង ប្តេជ្ញាពង្រឹងកិច្ចសហប្រតិបត្តិការការពារជាតិ ជាមួយកម្ពុជា និងបន្តគាំទ្រការបណ្តុះបណ្តាលកងទ័ពកម្ពុជា
* ដាណឺម៉ាក ផ្តល់សច្ចាប័នលើកិច្ចព្រមព្រៀងជុំវិញកោះ Greenland ជាមួយលោក ត្រាំ ដោយសង្ឃឹមថាវានឹងបិទបញ្ចប់បញ្ហាវិវាទ
* អាមេរិកដាក់ទណ្ឌកម្មលើបុគ្គល និងអង្គភាពចំនួនប្រាំ ដែលធ្វើប្រតិបត្តិការ និងសម្របសម្រួលឱ្យមានមជ្ឈមណ្ឌលបោកប្រាស់តាមប្រព័ន្ធអនឡាញ
* លោក ពូទីន អះអាងថារុស្ស៉ីបបួលអឺរ៉ុបជួបគ្នានៅមូស្គូ ដើម្បីបញ្ជាក់ឱ្យច្បាស់ពីគោលជំហរចំពោះកិច្ចចរចាស្ដីពីសង្រ្គាមអ៊ុយក្រែន
* កម្ពុជា ច្រានចោលការចោទប្រកាន់របស់ក្រសួងការបរទេសថៃ ដែលចោទកម្ពុជាថា ប្រើប្រាស់កិច្ចប្រជុំហ្វ្រង់កូហ្វូនីនៅភ្នំពេញ ដើម្បីបង្ខូចកេរ្តិ៍ឈ្មោះថៃ
* ប្រធានាធិបតី ដូណាល់ ត្រាំ ថ្លែងរំលឹកសារជាថ្មីនៅចំពោះមុខប្រជុំ APEC ថា «ថៃត្រូវគោរពកិច្ចព្រមព្រៀងបទឈប់បាញ់ និងត្រូវអនុញ្ញាតឲ្យជនភៀសសឹកកម្ពុជាទាំងអស់វិលត្រឡប់មកលំនៅដ្ឋានវិញ»
* ⁨CoolApp របស់កម្ពុជាមានមុខងារ «Reel» ថ្មី ផ្តល់បទពិសោធន៍អូសមើលវីដេអូខ្លីៗដូចបណ្តាញសង្គម TikTok

អភិបាលខេត្តព្រះវិហារ៖ វិស័យកសិកម្មរួមចំណែក ៥៣% នៃ GDP ខេត្ត ឬប្រមាណ ២០០លានដុល្លារក្នុងមួយឆ្នាំ ដែលជាប្រភពចំណូលផ្ទាល់របស់ប្រជាពលរដ្ឋ

20-11-2026 15:18

(ព្រះវិហារ)៖ លោក គីម រិទ្ធី អភិបាលខេត្តព្រះវិហារ នៅថ្ងៃទី១៩ ខែវិច្ឆិកា ឆ្នាំ២០២៦ បានគូសបញ្ជាក់ថា ខេត្តព្រះវិហារមានផលិតផលក្នុងស្រុកសរុប (GDP) ប្រមាណ ៤០០លានដុល្លារក្នុងមួយឆ្នាំ ក្នុងនោះវិស័យកសិកម្មរួមចំណែកប្រមាណ ៥៣% ឬស្មើនឹងប្រមាណ ២០០លានដុល្លារ ដែលជាចំណូលចាក់បញ្ចូលដោយផ្ទាល់ទៅក្នុងសេដ្ឋកិច្ច និងជីវភាពរស់នៅរបស់ប្រជាពលរដ្ឋ។

លោកបានលើកឡើងបែបនេះ ក្នុងឱកាសដែលក្រសួងបរិស្ថាន និងអង្គការស្បៀង និងកសិកម្មនៃអង្គការសហប្រជាជាតិ (FAO) បានប្រគល់គ្រឿងយន្តកសិកម្មចំនួន ៣១ គ្រឿង ជូនសហគមន៍កសិកម្មចំនួន ២៨ក្រោមគម្រោង PEARL នៅខេត្តព្រះវិហារ។

លោក គីម រិទ្ធី បានបញ្ជាក់ថា ខេត្តព្រះវិហារនៅតែជាខេត្តដែលមានកម្រិតចំណូលមធ្យមទាបជាងគេទី២ បន្ទាប់ពីខេត្តឧត្តរមានជ័យ ដោយមានចំណូលជាមធ្យមប្រមាណ ១,៧៧៧ដុល្លារក្នុងមួយឆ្នាំ ខណៈខេត្តមួយចំនួនមានចំណូលជាមធ្យមចាប់ពី ២,០០០ដុល្លារ រហូតដល់ ៣,០០០ដុល្លារក្នុងមួយឆ្នាំ។

លោកបានឱ្យដឹងទៀតថា ការផ្ដល់គ្រឿងយន្តកសិកម្មនេះ ធ្វើឡើងចំពេលដែលខេត្តព្រះវិហារកំពុងមមាញឹកក្នុងរដូវច្រូតកាត់ស្រូវ ខណៈតម្លៃស្រូវនៅឆ្នាំនេះកំពុងឡើងថ្លៃ ធ្វើឱ្យតម្រូវការសេវាច្រូតកាត់មានការកើនឡើង។ ស្ថានភាពនេះបានធ្វើឱ្យថ្លៃឈ្នួលច្រូតស្រូវកើនឡើងពី ២៥ម៉ឺនរៀល ទៅ ៣០ម៉ឺនរៀល ក្នុងមួយហិកតា ទៅ ៤០ម៉ឺនរៀល និង ៥០ម៉ឺនរៀល ក្នុងមួយហិកតា។

ជាមួយគ្នានេះ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងថា ការផ្ដល់គ្រឿងយន្តកសិកម្មដល់សហគមន៍ គឺជាការគាំទ្រដល់កសិករតាមរយៈការប្រើប្រាស់សម្ភារៈរួម។ ដើម្បីធានានិរន្តរភាព សហគមន៍ត្រូវមានផែនការអាជីវកម្មច្បាស់លាស់ ចេះប្រើប្រាស់ និងថែទាំគ្រឿងយន្តឱ្យបានត្រឹមត្រូវ។

លោករដ្ឋមន្ត្រីបានបញ្ជាក់ថា គោលនយោបាយកសិកម្មមិនមែនផ្ដោតតែលើការបង្កើនបរិមាណផលិតកម្មប៉ុណ្ណោះទេ ប៉ុន្តែត្រូវផ្ដោតលើការកាត់បន្ថយថ្លៃដើម បង្កើនគុណភាព និងតម្លៃបន្ថែមនៃផលិតផល ដើម្បីឱ្យកសិករទទួលបានប្រាក់ចំណេញកាន់តែច្រើន។

ជាពិសេស ការជំរុញផលិតកម្មសរីរាង្គ និងការកែច្នៃផលិតផលកសិកម្ម និងជលផល ក៏ជាមធ្យោបាយសំខាន់ក្នុងការពង្រីកទីផ្សារ និងបង្កើនតម្លៃផលិតផលរបស់សហគមន៍ផងដែរ។

ដោយឡែក លោកស្រី រេប៊ែកកា ប៊ែល តំណាងអង្គការស្បៀង និងកសិកម្មនៃអង្គការសហប្រជាជាតិ (FAO) ប្រចាំកម្ពុជា បានលើកឡើងថា ខេត្តព្រះវិហារមានសក្ដានុពលលើវិស័យជលផល និងវារីវប្បកម្ម។

លោកស្រីបានបញ្ជាក់ថា FAO គឺឈរយ៉ាងរឹងមាំជាមួយរាជរដ្ឋាភិបាលកម្ពុជា ជាពិសេសក្រសួងទាំង៣ រួមមាន ក្រសួងកសិកម្ម រុក្ខាប្រមាញ់ និងនេសាទ ក្រសួងបរិស្ថាន និងក្រសួងធនធានទឹក និងឧតុនិយម ដើម្បីរួមគ្នាជំរុញវឌ្ឍនភាព និងការអភិវឌ្ឍវិស័យទាំងនេះឱ្យកាន់តែរីកចម្រើនបន្ថែមទៀត។

សូមជម្រាបថា គម្រោង PEARL គឺជាគម្រោងដែលមានគោលបំណងគាំទ្រដល់កសិករខ្នាតតូចឱ្យអនុវត្តកសិកម្មធន់នឹងការប្រែប្រួលអាកាសធាតុ លើកកម្ពស់ផលិតភាព និងពង្រឹងការតភ្ជាប់ទៅកាន់ទីផ្សារប្រកបដោយនិរន្តរភាព៕