* ព្រឹកថ្ងៃនេះ សម្តេចមហាបវរធិបតី ហ៊ុន ម៉ាណែត អញ្ជើញបើកពិព័រណ៍ផលិតផលខ្មែរលើកទី៤
* វៀតណាម លុបចោលទោសប្រហារជីវិតលើបទល្មើសជួញដូរគ្រឿងញៀន និងបទល្មើសមួយចំនួនទៀត
* វិភាគអន្តរជាតិ៖ នៅពីក្រោយផ្ទាំងទស្សនីយភាពការទូតនៃមហាយក្សទាំង៣
* មីយ៉ាន់ម៉ាចាត់ទុកសាលក្រម ICJ រឿងអំពើប្រល័យពូជសាសន៍ថា «អយុត្តិធម៌»
* ឯកអគ្គរដ្ឋទូតបារាំង៖ បារាំង ប្តេជ្ញាពង្រឹងកិច្ចសហប្រតិបត្តិការការពារជាតិ ជាមួយកម្ពុជា និងបន្តគាំទ្រការបណ្តុះបណ្តាលកងទ័ពកម្ពុជា
* ដាណឺម៉ាក ផ្តល់សច្ចាប័នលើកិច្ចព្រមព្រៀងជុំវិញកោះ Greenland ជាមួយលោក ត្រាំ ដោយសង្ឃឹមថាវានឹងបិទបញ្ចប់បញ្ហាវិវាទ
* អាមេរិកដាក់ទណ្ឌកម្មលើបុគ្គល និងអង្គភាពចំនួនប្រាំ ដែលធ្វើប្រតិបត្តិការ និងសម្របសម្រួលឱ្យមានមជ្ឈមណ្ឌលបោកប្រាស់តាមប្រព័ន្ធអនឡាញ
* លោក ពូទីន អះអាងថារុស្ស៉ីបបួលអឺរ៉ុបជួបគ្នានៅមូស្គូ ដើម្បីបញ្ជាក់ឱ្យច្បាស់ពីគោលជំហរចំពោះកិច្ចចរចាស្ដីពីសង្រ្គាមអ៊ុយក្រែន
* កម្ពុជា ច្រានចោលការចោទប្រកាន់របស់ក្រសួងការបរទេសថៃ ដែលចោទកម្ពុជាថា ប្រើប្រាស់កិច្ចប្រជុំហ្វ្រង់កូហ្វូនីនៅភ្នំពេញ ដើម្បីបង្ខូចកេរ្តិ៍ឈ្មោះថៃ
* ប្រធានាធិបតី ដូណាល់ ត្រាំ ថ្លែងរំលឹកសារជាថ្មីនៅចំពោះមុខប្រជុំ APEC ថា «ថៃត្រូវគោរពកិច្ចព្រមព្រៀងបទឈប់បាញ់ និងត្រូវអនុញ្ញាតឲ្យជនភៀសសឹកកម្ពុជាទាំងអស់វិលត្រឡប់មកលំនៅដ្ឋានវិញ»
* ⁨CoolApp របស់កម្ពុជាមានមុខងារ «Reel» ថ្មី ផ្តល់បទពិសោធន៍អូសមើលវីដេអូខ្លីៗដូចបណ្តាញសង្គម TikTok

កម្ពុជា អរគុណបែលហ្ស៊ិក ដែលគាំទ្រដំណោះស្រាយព្រំដែនដោយសន្តិវិធី ខណៈប្រធានសភាវ៉ាឡូនី-ព្រុចសែល ជូនពរជនភៀសសឹកឆាប់បានវិលត្រឡប់ទៅផ្ទះវិញ

20-11-2026 18:09

(ភ្នំពេញ)៖ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានថ្លែងអំណរគុណចំពោះប្រទេសបែលហ្ស៊ិក ដែលបានគាំទ្រអធិបតេយ្យ បូរណភាពទឹកដីរបស់កម្ពុជា និងការដោះស្រាយបញ្ហាព្រំដែនដោយសន្តិវិធីស្របតាមច្បាប់អន្តរជាតិ ខណៈលោក បឺន័រត៍ ឌីសប៉ា ប្រធានសភាសហព័ន្ធវ៉ាឡូនី-ព្រុចសែល បានជូនពរឱ្យជនភៀសសឹកកម្ពុជា អាចវិលត្រឡប់ទៅកាន់លំនៅដ្ឋានរបស់ពួកគេវិញដោយសុវត្ថិភាព និងបានឆាប់រហ័ស។

យោងតាមសេចក្តីប្រកាសព័ត៌មានរបស់ក្រសួងការបរទេស ចុះថ្ងៃទី១៩ ខែវិច្ឆិកា ឆ្នាំ២០២៦ ការលើកឡើងនេះត្រូវបានធ្វើឡើងនៅក្នុងជំនួបសម្តែងការគួរសម និងពិភាក្សាការងាររវាងលោកឧបនាយករដ្ឋមន្ត្រី ប្រាក់ សុខុន និងលោក បឺន័រត៍ ឌីសប៉ា នៅទីស្តីការក្រសួង កាលពីរសៀលថ្ងៃទី១៨ ខែវិច្ឆិកា ឆ្នាំ២០២៦។

នៅក្នុងជំនួបនោះ លោកឧបនាយករដ្ឋមន្ត្រី ប្រាក់ សុខុន បានកោតសរសើរចំពោះការចូលរួមយ៉ាងសកម្មរបស់សភាសហព័ន្ធវ៉ាឡូនី-ព្រុចសែល ក្នុងកិច្ចប្រជុំកំពូលហ្វ្រង់កូហ្វូនីលើកទី២០ ដែលកម្ពុជាធ្វើជាម្ចាស់ផ្ទះ ព្រមទាំងបានថ្លែងអំណរគុណយ៉ាងជ្រាលជ្រៅចំពោះគោលជំហររបស់ប្រទេសបែលហ្ស៊ិក ក្នុងការគាំទ្រអធិបតេយ្យ បូរណភាពទឹកដីកម្ពុជា និងដំណោះស្រាយព្រំដែនដោយសន្តិវិធីតាមច្បាប់អន្តរជាតិ។ ជាការឆ្លើយតប លោកប្រធានសភា បានកោតសរសើរកម្ពុជាដែលបានរៀបចំកិច្ចប្រជុំកំពូលហ្វ្រង់កូហ្វូនីលើកទី២០ ប្រព្រឹត្តទៅដោយរលូន និងប្រកបដោយផ្លែផ្កា ហើយពាក់ព័ន្ធនឹងបញ្ហាព្រំដែន លោកបានជូនពរឱ្យជនភៀសសឹកកម្ពុជាឆាប់បានវិលត្រឡប់ទៅកាន់លំនៅដ្ឋានដើមវិញប្រកបដោយសុវត្ថិភាព។

ក្រៅពីបញ្ហាព្រំដែន និងកិច្ចប្រជុំកំពូលហ្វ្រង់កូហ្វូនី ភាគីទាំងពីរក៏បានសម្តែងការពេញចិត្តចំពោះការរីកចម្រើននៃទំនាក់ទំនងល្អ និងកិច្ចសហប្រតិបត្តិការរវាងកម្ពុជា និងសហព័ន្ធវ៉ាឡូនី-ព្រុចសែល ក៏ដូចជាបែលហ្ស៊ិកជារួម។ ថ្នាក់ដឹកនាំទាំងពីរបានបង្ហាញឆន្ទៈរួមក្នុងការពង្រឹង និងពង្រីកភាពជាដៃគូបន្ថែមទៀតលើវិស័យវប្បធម៌ អប់រំ ឧត្តមសិក្សា ការស្រាវជ្រាវ និងការបណ្តុះបណ្តាល ជាពិសេសកិច្ចសហប្រតិបត្តិការរវាងសហគមន៍និយាយភាសាបារាំងនៃប្រទេសបែលហ្ស៊ិក និងស្ថាប័នអប់រំកម្ពុជា។

ជំនួបពិភាក្សានេះបានប្រព្រឹត្តទៅក្នុងបរិយាកាសស្និទ្ធស្នាល ដោយឆ្លុះបញ្ចាំងពីការប្តេជ្ញាចិត្តរួមគ្នារបស់ភាគីទាំងពីរ ក្នុងការបន្តពង្រឹងទំនាក់ទំនងការទូត និងជំរុញកិច្ចសហប្រតិបត្តិការទ្វេភាគីឱ្យកាន់តែជិតស្និទ្ធថែមមួយកម្រិតទៀត៕