សហភាពអឺរ៉ុប និងអង់គ្លេស សម្រេចបានកិច្ចព្រមព្រៀងស្តារទំនាក់ទំនងក្រោយ Brexit នៅទីក្រុងព្រុចសែល
20-11-2026 22:26
(ព្រុចសែល)៖ នាយករដ្ឋមន្ត្រីអង់គ្លេស លោក អែនឌី ប៊ើនហាំ (Andy Burnham) និងថ្នាក់ដឹកនាំកំពូលនៃសហភាពអឺរ៉ុប (EU) បានឈានដល់កិច្ចព្រមព្រៀងសម្រួលពាណិជ្ជកម្ម និងការធ្វើដំណើររបស់យុវជន ក្នុងកិច្ចប្រជុំកំពូលនៅទីក្រុងព្រុចសែល កាលពីថ្ងៃសុក្រ ដែលចាត់ទុកជាជំហានដំបូងក្នុងការស្តារទំនាក់ទំនងឡើងវិញបន្ទាប់ពីចក្រភពអង់គ្លេសចាកចេញពីប្លុកនេះ (Brexit)។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។
កិច្ចព្រមព្រៀងសំខាន់ៗទាំង ៣ ដែលភាគីទាំងពីរសម្រេចបាន រួមមាន ការកាត់បន្ថយនីតិវិធីស្មុគស្មាញសម្រាប់ការនាំចេញម្ហូបអាហារ ការតភ្ជាប់ប្រព័ន្ធជួញដូរការបំភាយឧស្ម័ន និងកម្មវិធីបទពិសោធន៍យុវជនដែលអនុញ្ញាតឱ្យយុវជនក្រោមអាយុ ៣០ឆ្នាំ ចំនួន ១០០ ០០០នាក់ ពីភាគីទាំងសងខាង អាចស្នាក់នៅធ្វើការ សិក្សា ឬធ្វើដំណើរក្នុងទឹកដីគ្នាទៅវិញទៅមករយៈពេលរហូតដល់ ៣ឆ្នាំ។ លោក ប៊ើនហាំ បានថ្លែងក្នុងជំនួបជាមួយប្រធានគណៈកម្មការអឺរ៉ុប លោកស្រី អ៊ួរស៊ូឡា វ៉ុន ឌែរ ឡេយ៉េន (Ursula von der Leyen) និងប្រធានក្រុមប្រឹក្សាអឺរ៉ុប លោក អាន់តូនីញ៉ូ កូស្តា (Antonio Costa) ថា «នេះជាថ្ងៃដ៏ល្អសម្រាប់ចក្រភពអង់គ្លេស និងជាថ្ងៃដ៏ល្អសម្រាប់អឺរ៉ុប» ខណៈលោកស្រី វ៉ុន ឌែរ ឡេយ៉េន ហៅកិច្ចព្រមព្រៀងនេះថាជា «ចំណុចរបត់» នៃទំនាក់ទំនងទ្វេភាគី។ ទោះជាយ៉ាងណា ភាគីទាំងពីរនៅតែខ្វែងគំនិតគ្នាលើការបញ្ចុះថ្លៃសិក្សាសម្រាប់និស្សិត EU នៅអង់គ្លេស។ ខណៈទីក្រុងឡុងដ៍អះអាងថាកិច្ចព្រមព្រៀងបានសម្រេចរួចរាល់ហើយ ដោយគ្រាន់តែបន្តចរចាថ្លៃសិក្សា ៦ខែទៀតនោះ ប្រទេសសមាជិក EU ទាំង ២៧ បញ្ជាក់ថានឹងមិនទាន់អនុម័តផ្លូវការឡើយ លុះត្រាតែមានកិច្ចព្រមព្រៀងលើបញ្ហាថ្លៃសិក្សានេះជាមុនសិន។
គួរបញ្ជាក់ថា ដប់ឆ្នាំបន្ទាប់ពីការបោះឆ្នោតចាកចេញពី EU កាលពីឆ្នាំ២០១៦ លោក ប៊ើនហាំ ដែលឡើងកាន់តំណែងកាលពីរដូវក្តៅកន្លងទៅ បានប្តេជ្ញាបើកការពិភាក្សាអំពីជម្រើសទំនាក់ទំនងរយៈពេលវែងជាមួយអឺរ៉ុប រាប់ចាប់ពីការចូលរួមក្នុងសហភាពគយ រហូតដល់ការវិលត្រឡប់ចូលជាសមាជិកប្លុកវិញ ស្របពេលដែលការស្ទង់មតិបង្ហាញថាប្រជាជនអង់គ្លេសភាគច្រើនសោកស្តាយចំពោះ Brexit និងចំពេលសេដ្ឋកិច្ចអង់គ្លេសកំពុងជួបបញ្ហាទន់ខ្សោយ។ យុទ្ធសាស្ត្រនេះសំដៅប្រមូលផ្តុំសំឡេងគាំទ្រសម្រាប់ការបោះឆ្នោតសកលនៅឆ្នាំ២០២៩ ប៉ុន្តែវាក៏រងការរិះគន់ខ្លាំងពីគណបក្សអភិរក្សនិយម និងមេដឹកនាំគណបក្ស Reform UK លោក ណៃជែល ហ្វារ៉ាហ្ស (Nigel Farage) ដែលបានចោទប្រកាន់លោក ប៊ើនហាំ តាមបណ្តាញសង្គម X ថា «លោក អែនឌី ប៊ើនហាំ ដែលឆោតល្ងង់ បានទៅទីក្រុងព្រុចសែល ហើយត្រូវប្រឈមនឹងការពិតដ៏តឹងរ៉ឹងដែលខ្ញុំបានព្រមានអស់រយៈពេលជាច្រើនទសវត្សរ៍មកហើយ»៕






