អង្គការហត្ថាវេជ្ជសាស្ត្រប្រើប្រាស់ជំនាញ Osteopathy ផ្តល់សេវាថែទាំព្យាបាលជូនបុគ្គលិក ២០០នាក់ របស់ក្រុមហ៊ុន Restaurant Collection Group
21-11-2026 17:02
(ភ្នំពេញ)៖ អង្គការហត្ថាវេជ្ជសាស្ត្រ (Hattha Vichesas) បានប្រើប្រាស់ជំនាញលំនឹងសរីរាង្គ (Osteopathy) ដើម្បីផ្តល់សេវាពិនិត្យសុខភាព និងថែទាំព្យាបាលជូនបុគ្គលិកប្រមាណ ២០០នាក់ របស់ក្រុមហ៊ុន Restaurant Collection Group តាមរយៈកិច្ចសហការជាមួយក្រុមគ្រូពេទ្យស្ម័គ្រចិត្តមកពីប្រទេសបារាំង និងប្រទេសកម្ពុជា ក្នុងគោលបំណងរួមចំណែកលើកកម្ពស់សុខភាព និងសុខុមាលភាពរបស់បុគ្គលិកនៅកន្លែងការងារ។
កម្មវិធីនេះបានផ្តល់ឱកាសឱ្យបុគ្គលិកទទួលបានការពិនិត្យសុខភាព និងសេវាថែទាំព្យាបាលដោយប្រើប្រាស់បច្ចេកទេសជំនាញ Osteopathy ដែលជាផ្នែកមួយនៃការយកចិត្តទុកដាក់លើសុខភាពរាងកាយ និងសុខុមាលភាពរបស់ក្រុមការងារ ព្រមទាំងលើកកម្ពស់ការយល់ដឹងអំពីសារៈសំខាន់នៃការថែទាំសុខភាពជាប្រចាំ។
តំណាងក្រុមហ៊ុន Restaurant Collection Group បានមានប្រសាសន៍ថា៖ «ជារៀងរាល់ឆ្នាំ ពួកយើងតែងតែចំណាយពេល ដើម្បីពិនិត្យ និងយកចិត្តទុកដាក់លើសុខភាពរបស់ក្រុមការងារ ព្រោះអ្នកដែលខិតខំប្រឹងប្រែងជាមួយពួកយើងរាល់ថ្ងៃ គួរតែទទួលបានការយកចិត្តទុកដាក់ដូចគ្នា»។
តំណាងក្រុមហ៊ុនបានបញ្ជាក់ថា ការយកចិត្តទុកដាក់ចំពោះសុខភាពរបស់បុគ្គលិក គឺជាផ្នែកមួយដ៏សំខាន់ក្នុងការកសាងក្រុមការងារដែលមានសុខភាពល្អ និងបរិយាកាសការងារប្រកបដោយភាពវិជ្ជមាន ព្រោះបុគ្គលិកគឺជាធនធានដ៏មានតម្លៃ និងជាកម្លាំងចម្បងក្នុងការរួមចំណែកដល់ការរីកចម្រើនរបស់ក្រុមហ៊ុន។
អង្គការហត្ថាវេជ្ជសាស្ត្រ (Hattha Vichesas) គឺជាអង្គការមិនរកប្រាក់ចំណេញ ដែលមានបេសកកម្មផ្តល់សេវាថែទាំសុខភាព និងសេវាព្យាបាលដោយប្រើប្រាស់ជំនាញលំនឹងសរីរាង្គ (Osteopathy) ដើម្បីរួមចំណែកជួយដល់កុមារ និងប្រជាជនដែលមានតម្រូវការផ្នែកសុខភាព ព្រមទាំងចូលរួមលើកកម្ពស់ការយល់ដឹង និងការអភិវឌ្ឍជំនាញសុខាភិបាលនៅកម្ពុជា។
តាមរយៈការងាររបស់ខ្លួន អង្គការនេះបានផ្តោតលើការផ្តល់សេវាថែទាំព្យាបាលដល់អ្នកដែលត្រូវការជំនួយផ្នែកសុខភាព ដោយប្រើប្រាស់ជំនាញ Osteopathy និងការចូលរួមពីក្រុមអ្នកជំនាញស្ម័គ្រចិត្ត។ ក្នុងនោះ ក្រុមគ្រូពេទ្យស្ម័គ្រចិត្តមកពីប្រទេសបារាំង និងប្រទេសកម្ពុជា បានចូលរួមចំណែកក្នុងការផ្តល់សេវាថែទាំព្យាបាល និងចែករំលែកចំណេះដឹងជំនាញដល់អ្នកទទួលសេវា។
ជាមួយគ្នានេះ អង្គការហត្ថាវេជ្ជសាស្ត្រក៏បានយកចិត្តទុកដាក់លើការលើកកម្ពស់សមត្ថភាព និងការយល់ដឹងអំពីជំនាញ Osteopathy ដើម្បីរួមចំណែកពង្រឹងការថែទាំសុខភាព និងជំរុញការចូលរួមរបស់អ្នកជំនាញក្នុងការផ្តល់សេវាសុខាភិបាលដល់សហគមន៍។
សម្រាប់កិច្ចសហការជាមួយក្រុមហ៊ុន Restaurant Collection Group នាពេលនេះ គឺជាការពង្រីកសកម្មភាពផ្តល់សេវាថែទាំសុខភាពទៅកាន់ក្រុមការងារក្នុងវិស័យឯកជន ដោយមានការចូលរួមពីក្រុមគ្រូពេទ្យស្ម័គ្រចិត្តមកពីប្រទេសបារាំង រ៉ូម៉ានី និងប្រទេសកម្ពុជា ដឹកនាំដោយលោកវេជ្ជបណ្ឌិត Patrick Jouhaud ស្ថាបនិកអង្គការហត្ថាវេជ្ជសាស្រ្ត។
សកម្មភាពនេះបានបង្ហាញពីសារៈសំខាន់នៃកិច្ចសហការរវាងអង្គការសង្គមស៊ីវិល និងវិស័យឯកជន ក្នុងការចូលរួមលើកកម្ពស់សុខភាព និងសុខុមាលភាពរបស់ធនធានមនុស្ស ព្រមទាំងជំរុញវប្បធម៌នៃការយកចិត្តទុកដាក់លើសុខភាពនៅកន្លែងការងារ៕














