(ភ្នំពេញ)៖ ក្នុងឱកាសដ៏មហោឡារិកឧត្តុង្គឧត្តម នៃពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ២៥៧០ គ.ស.២០២៦នេះ យើងខ្ញុំជាសមាជិក សមាជិកា គណៈកម្មាធិការកណ្តាល អគ្គលេខាធិការដ្ឋាន និងមន្ត្រី បុគ្គលិក អ្នកស្ម័គ្រចិត្ត និងយុវជនកាកបាទក្រហមកម្ពុជា សូមគោរពជូននូវសព្ទសាធុការពរជ័យ បវរសួស្តី សិរីមង្គលវិបុលសុខ មហាប្រសើរគ្រប់ប្រការជូនសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ច័ន្ទមុន្នី សូមមានសុខភាពល្អបរិបូរណ៍ កម្លាំងខ្លាំងក្លា បញ្ញាញាណឈ្លាសវៃ និងមានជន្មាយុយឺនយូរ ដើម្បីដឹកនាំជាតិ មាតុភូមិកម្ពុជា បានកាន់តែថ្កុំថ្កើងរុងរឿងជារៀងដរាបតទៅ។

ក្នុងឱកាសដ៏វិសេសវិសាលនេះ យើងខ្ញុំទាំងអស់គ្នា នៃកាកបាទក្រហមកម្ពុជា សូមគោរពកោតស្ញប់ស្ញែងក្រៃលែង ក្នុងមនោសញ្ចេតនាគោរពស្រឡាញ់ និងពេញចិត្តបំផុតចំពោះសម្តេចមហាបវរធិបតី នាយករដ្ឋមន្ត្រី ដែលបាននិងកំពុងបំពេញបេសកកម្មយ៉ាងស្រួចស្រាល់ក្នុងបុព្វហេតុបម្រើជាតិ ប្រកបដោយស្មារតីមនសិការ ស្នេហាជាតិ និងការទទួលខុសត្រូវខ្ពស់ ដើម្បីវឌ្ឍនភាព វិបុលភាព និងភាពរុងរឿង របស់ជាតិ មាតុភូមិ និងប្រជាជន។

ជាក់ស្តែងក្នុងកាលៈទេសៈនៃជម្លោះប្រដាប់អាវុធតាមបណ្តោយព្រំដែនកម្ពុជា-ថៃ ពីរលើកកន្លងមកនេះ សម្តេចមហាបវរធីបតី នាយករដ្ឋមន្ត្រី បានខិតខំប្រឹងប្រែងយកអស់កម្លាំងកាយ ចិត្ត បញ្ញា ស្មារតី ដោយមិនគិតពីការ នឿយហត់ ជម្នះរាល់ឧបសគ្គគ្រប់បែបយ៉ាង ដើម្បីការពារសុខសន្តិភាព អធិបតេយ្យភាពជាតិ បូរណភាពទឹកដី និងការពារអាយុជីវិតវីរកងទ័ពជួរមុខ និងកងកម្លាំងគ្រប់លំដាប់ថ្នាក់ដោយប្រសិទ្ធភាព តាមរយៈយុទ្ធសាស្ត្រយុទ្ធវិធីការទូតប្រកបដោយភាពបត់បែន និងភាពអត់ធ្មត់ដ៏មានតម្លៃបំផុត ជាពិសេស ការតស៊ូទាមទារមកវិញឱ្យបាននូវ សន្តិភាព សុខសុវត្ថិភាព ស្ថិរភាពប្រជាជនតាមបណ្តោយព្រំដែនកម្ពុជា-ថៃ ក៏ដូចជាសន្តិភាពសម្រាប់តំបន់ផងដែរ។

ក្នុងឱកាសដ៏សិរីសួស្តីថ្លៃថ្លានេះ យើងខ្ញុំទាំងអស់គ្នា នៃកាកបាទក្រហមកម្ពុជា សូមបួងសួងដល់គុណបុណ្យ ព្រះរតនត្រ័យ តេជះបារមីនៃវត្ថុស័ក្តិសិទ្ធិទាំងអស់ក្នុងលោក ទេវតាថែរក្សាទឹកដី នៃព្រះរាជាណាចក្រកម្ពុជា ជាពិសេសទេវតាឆ្នាំថ្មីព្រះនាម «រាក្យសាទេវី» សូមជួយអភិបាលប្រោះព្រំគ្រងរក្សា សម្តេចមហាបវរធិបតី និងលោកជំទាវបណ្ឌិត ព្រមទាំងបុត្រា បុត្រី ជាទីស្រឡាញ់ សូមបានប្រកបដោយព្រះពុទ្ធពរទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕