(ភ្នំពេញ)៖ សម្ដេចព្រះមហាសុមេធាធិបតី អំ លីមហេង សម្តេចព្រះសង្ឃនាយក គណៈ​មហានិកាយនៃព្រះរាជាណាចក្រកម្ពុជា ព្រមទាំងគណៈសង្ឃពុទ្ធសាសនាកម្ពុជា ថ្វាយ​ព្រះ​ពរ​ដល់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ​នៃព្រះរាជាណាចក្រកម្ពុជា សូមព្រះអង្គឆាប់បានជាសះស្បើពី​ព្រះរោគព្យាធិ។

សម្ដេចព្រះមហាសុមេធាធិបតី អំ លីមហេង ព្រមទាំងគណៈសង្ឃពុទ្ធសាសនាកម្ពុជា សូមបួង​សួងដល់គុណបុណ្យ ព្រះរតនត្រ័យវត្ថុស័ក្ដិសិទ្ធិទាំងឡាយក្នុងលោក និងទេវ​តារក្សាព្រះ​មហាស្វេតច្ឆត្រ សូមជួយប្រោះព្រំសព្ទសាធុការពរ សិរីសួស្ដី ជ័យ​មង្គល វិបុលសុខ បវរមហា​ប្រសើរថ្វាយ ព្រះករុណាជាអម្ចាស់ជីវិត សូមព្រះអង្គទ្រង់ មានព្រះរាជសុខភាពល្អបរិបូរណ៍ ព្រះកាយពលមាំមួន ព្រះបញ្ញាញាណភ្លឺថ្លា និងព្រះ​ជន្មា​យុយឺនយូរ ដើម្បីបន្តព្រះរាជកិច្ចដ៏ឧត្ដុង្គឧត្តមក្នុងបុព្វហេតុ ជាតិមាតុភូមិ និងប្រជា​រាស្ត្រ ជាពិសេសបន្តគង់ប្រថាប់ជាព្រះនិមិត្តរូបដ៏ពិសិដ្ឋនៃឯករាជ្យ ឯកភាពជាតិ កិត្យា​នុភាព អធិបតេយ្យ និងបូរណភាពទឹកដីនៃព្រះរាជាណាចក្រកម្ពុជា កុំបីឃ្លៀងឃ្លាតឡើយ។

សម្ដេចព្រះមហាសុមេធាធិបតី អំ លីមហេង ព្រមទាំងគណៈសង្ឃពុទ្ធសាសនាកម្ពុជា សូមថ្វាយព្រះពរ ព្រះករុណាជា​អម្ចាស់​ជីវិត ទ្រង់ឆាប់បានជាសះស្បើយពីព្រះរោគាព្យាធិ និងបានយាងនិវត្តន៍ មកមាតុ​ប្រទេសវិញក្នុងពេលឆាប់ៗ ដើម្បីបន្តគង់ប្រថាប់ជាម្លប់​ដ៏​ត្រជាក់​​ត្រជំ​សុខដុមសម្រាប់​ប្រជារាស្ត្រខ្មែរជានិរន្តរ៍តរៀងទៅ៕