(ភ្នំពេញ)៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជា បានផ្ញើសារលិខិតជូនពរ សម្តេចអគ្គមហាពញាចក្រី ហេង សំរិន ប្រធានកិត្តិយស នៃក្រុមឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា ក្នុងឱកាសចម្រើនជន្មាយុ។

ក្នុងសារលិខិតជូនពររបស់ សម្តេចរដ្ឋសភាធិបតី ឃួន សុដារី បានសរសេរថា៖ «នាឱកាសដ៏មហាមង្គលាភិរម្យប្រសើរថ្លៃថ្លាបំផុត នៃពិធីចម្រើនជន្មាយុរបស់ សម្តេចអគ្គមហាពញាចក្រី ដែលនឹងប្រព្រឹត្តទៅនៅថ្ងៃចន្ទ ៩កើត ខែជេស្ឋ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២៥ ខែឧសភា ឆ្នាំ២០២៦ តាងនាមរដ្ឋសភានៃព្រះរាជាណាចក្រកម្ពុជា និងក្នុងនាមនាងខ្ញុំផ្ទាល់ នាងខ្ញុំសូមសម្តែងនូវទឹកចិត្ត ប្រកបដោយមនោសញ្ចេតនាគោរពដឹងគុណយ៉ាងជ្រាលជ្រៅបំផុត និងសូមគោរពប្រសិទ្ធពរជ័យ សិរីមង្គល មហាប្រសើរជូនចំពោះ សម្តេចអគ្គមហាពញាចក្រី សូមបានប្រកបដោយសុខភាពល្អបរិបូរណ៍ កាយពលមាំមួន បញ្ញាញាណវាងវៃភ្លឺថ្លា និងជន្មាយុយឺនយូរជាអង្វែងតរៀងទៅ»។

ឆ្លៀតក្នុងវរោកាសដ៏មហានក្ខត្តឫក្សអធិកអធមបំផុតនេះ យើងខ្ញុំទាំងអស់គ្នាសូមសម្តែងនូវកតញ្ញូតាធម៌ និងការកោតសរសើរដ៏ស្មោះអស់ពីដួងចិត្ត ជូនចំពោះគុណូបការៈ និងគំរូវីរភាពដ៏ឧត្តុង្គឧត្តមបវរថ្លៃថ្លារបស់ សម្តេចអគ្គមហាពញាចក្រី ដែលកន្លងមកតែងតែខិតខំប្រឹងប្រែងយកអស់កម្លាំងកាយចិត្ត ប្រាជ្ញាស្មារតី និង បទពិសោធប្រកបដោយឆន្ទៈមោះមុតខ្លាំងក្លាបំផុតក្នុងបុព្វហេតុស្វែងរកសុខសន្តិភាព ស្ថិរភាពនយោបាយ ឯកភាពជាតិ ការកសាង និងការអភិវឌ្ឍជាតិមាតុភូមិកម្ពុជាឱ្យកាន់តែមានភាពរីកចម្រើនជឿនលឿនខ្លាំងក្លា ឈានមុខឡើង តាមរយៈការលើកកម្ពស់នីតិរដ្ឋ លទ្ធិប្រជាធិបតេយ្យសេរីពហុបក្ស ការគោរពសិទ្ធិមនុស្ស ការធ្វើកំណែទម្រង់រដ្ឋស៊ីជម្រៅលើគ្រប់វិស័យ ការពង្រឹងសមត្ថភាពស្ថាប័ន និងការកសាងសមិទ្ធផលសង្គម នានាទាំងផ្នែកអាណាចក្រ និងពុទ្ធចក្រ ដែលជាគ្រឹះដ៏រឹងមាំក្នុងការឆ្លើយតបទៅនឹងបំណងប្រាថ្នារបស់ ប្រជាជនកម្ពុជា គឺភាពសុខដុមរមនា ភាពសម្បូរសប្បាយ និងភាពរុងរឿងថ្កុំថ្កើង ជារៀងដរាបតទៅ។

ជាថ្មីម្តងទៀត យើងខ្ញុំទាំងអស់គ្នាសូមលើកហត្ថបួងសួងដល់គុណបុណ្យព្រះរតនត្រ័យ វត្ថុស័ក្តិសិទ្ធិ ក្នុងលោក និងទេវតាថែរក្សាព្រះរាជាណាចក្រកម្ពុជា សូមជួយប្រោះព្រំសព្ទសាធុការពរ សិរីសួស្តី ជ័យមង្គល វិបុលសុខបវរមហាប្រសើរគ្រប់ប្រការជូនចំពោះ សម្តេចអគ្គមហាពញាចក្រី និងសម្តេចធម្មវិសុទ្ធវង្សា ព្រមទាំង ក្រុមគ្រួសារជាទីស្រឡាញ់ សូមបានប្រកបដោយពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបី ឃ្លៀងឃ្លាតឡើយ៕