សម្តេចមហាមន្ត្រី គុយ សុផល ផ្ញើសារលិខិតគោរពជូនពរ សម្តេចរដ្ឋសភាធិបតី ឃួន សុដារី ក្នុងឱកាសខួបចម្រើនជន្មាយុ
18-11-2026 16:14
(ភ្នំពេញ)៖ សម្តេចមហាមន្ត្រី គុយ សុផល ឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជវាំង តាងនាមថ្នាក់ដឹកនាំ មន្ត្រីរាជការ បុគ្គលិក កម្មករ និងកងកម្លាំងនគរបាលទាំងអស់ដែលកំពុងបម្រើការងារនៅក្នុងព្រះបរមរាជវាំង បានផ្ញើសារលិខិតគោរពជូនពរ បវរមហាប្រសើរជូន សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា ក្នុងឱកាសដ៏មហានក្ខត្តឫក្សនៃខួបចម្រើនជន្មាយុរបស់សម្តេច នៅថ្ងៃទី១៨ ខែវិច្ឆិកា ឆ្នាំ២០២៦។
តាមរយៈសារលិខិតចុះថ្ងៃទី១៧ ខែវិច្ឆិកា ឆ្នាំ២០២៦ សម្តេចមហាមន្ត្រី គុយ សុផល បានសម្តែងនូវការគោរពកោតសរសើរដ៏ខ្ពង់ខ្ពស់បំផុតជូន សម្តេចមហារដ្ឋសភាធិការធិបតី ឃួន សុដារី ដែលបានបំពេញតួនាទី និងភារកិច្ចដ៏ឧត្តុង្គឧត្តម ប្រកបដោយភាពឈ្លាសវៃ និងម៉ឺងម៉ាត់ ក្នុងការចូលរួមចំណែកការពារអធិបតេយ្យភាពជាតិ និងបូរណភាពទឹកដី ថែរក្សាសន្តិភាព និងស្ថិរភាពសង្គម។
សម្តេចមហាមន្ត្រី បានគូសបញ្ជាក់បន្ថែមថា សម្តេចប្រធានរដ្ឋសភា បានដឹកនាំស្ថាប័នរដ្ឋសភា ដែលជាស្ថាប័នកំពូលជាតិ ក្នុងការកសាងប្រព័ន្ធច្បាប់ ការពង្រឹងនីតិរដ្ឋ និងការពង្រឹងសមត្ថភាពក្នុងស្ថាប័ន ទទួលបានជោគជ័យយ៉ាងត្រចះត្រចង់ជូនជាតិ និងមាតុភូមិកម្ពុជា។ ទន្ទឹមនឹងនេះ សម្តេចរដ្ឋសភាធិការធិបតី ក៏បានរួមចំណែកយ៉ាងសំខាន់ក្នុងការពង្រឹងចំណងមិត្តភាព និងកិច្ចសហប្រតិបត្តិការជាមួយបណ្តាប្រទេសជាមិត្ត ដែលបានជំរុញការអភិវឌ្ឍសេដ្ឋកិច្ច និងសង្គមកម្ពុជាឱ្យកាន់តែរីកចម្រើនជឿនលឿនទៅមុខបន្តទៀត។
ជាទីបញ្ចប់ សម្តេចមហាមន្ត្រី គុយ សុផល បានបួងសួងដល់គុណបុណ្យព្រះរតនត្រ័យ និងគុណបារមីវត្ថុស័ក្តិសិទ្ធិនានាក្នុងលោក សូមប្រោះព្រំនូវទឹកអម្រឹត ប្រសិទ្ធពរជ័យ សិរីមង្គល បវរមហាប្រសើរជូន សម្តេចមហារដ្ឋសភាធិការធិបតី ឃួន សុដារី សូមប្រកបដោយសុខភាពល្អបរិបូរណ៍ កម្លាំងពលំមាំមួន ជន្មាយុយឺនយូរ និងប្រកបតែនឹងព្រះពុទ្ធពរ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕





